الماتى اسكەري سوتى قاڭتار وقيعاسى كەزىندە قازا تاپقان ءتورت جاسار ايكوركەم مەلدەحاننىڭ ولىمىنە قاتىستى تالقىلاۋدى اياقتادى، دەپ حابارلايدى «ادىرنا» ءتىلشىسى Orda.kz-كە سىلتەمە جاساپ.
سوتتا پروكۋرور ايدوس اقبەرگەن ايىپتالۋشى اسكەري قىزمەتكەر ارمان جۇماندى 7 جىلعا باس بوستاندىعىنان ايىرۋدى سۇرادى. بۇل — «بيلىكتى اسىرا پايدالانۋ» (451-باپ، 2-بولىگى 1-تارماعى) بابى بويىنشا ەڭ قاتال جازا.
قازا تاپقان قىزدىڭ اكەسى سوت پروتسەسىنىڭ ءوتۋ بارىسىنا كوڭىلى تولمايتىنىن جەتكىزدى.
«نە سەبەپتى بەس ادامنىڭ كۋاگەر رەتىندە ءوتىپ وتىرعانىن تۇسىنبەيمىن، ولار ارمان جۇمانمەن قاتار ايىپتالۋشى ورنىندا وتىرۋى كەرەك ەدى. سەبەبى ايىپتالۋشىنىڭ قاسىندا بولدى. ولار ەشتەڭەگە قاراماي كولىككە وق اتا بەرگەن. بىراق بۇل قىزمەتكەرلەرگە بۇيرىقتى كىم بەرگەن؟نەگە ءبولىم كومانديرى، باتالون كومانديرىن جازالامايدى؟»—دەدى ايدوس مەلدەحان.
باسىلىمنىڭ جازۋىنشا، كۇدىكتىنىڭ قورعاۋشىسى سوتتان ونى تولىق اقتاۋدى تالاپ ەتكەن.
ەسكە سالساق، ءتورت جاسار ايكوركەم مەلدەحان 7 قاڭتاردا اكەسىنىڭ كولىگىندە قايتىس بولعان. وق قىزدىڭ باسىنا ءتيىپ، ول سول جەردە جان تاپسىرعان. بۇل كەزدە كولىكتە ونىڭ اعاسى مەن اپكەسى بولعان، ولار دا جاراقات العان.
بۇعان دەيىن سۋديا ىستە «مەملەكەتتىك قۇپيا» مالىمەتتەر بار ەكەنىن ايتىپ، سوتتى جابىق ەتكەن ەدى. بۇعان جابىرلەنۋشى جاق قارسى بولعان.
