قۇمار ويىن نارىعى جىلجىمايتىن مۇلىك نارىعىنان ەكى ەسە اسىپ ءتۇستى. 350 مىڭنان استام قازاقستاندىق ازامات وسىنداي ويىندارعا تاۋەلدى. لۋدومانياعا قارسى ءىس-قيمىل جۇرگىزۋدىڭ ءادىس-ءتاسىلى مەن بۋكمەكەرلىك كەڭسەلەردىڭ قىزمەتىن رەتتەۋ ماسەلەلەرى بۇگىن ماجىلىستەگى «AMANAT» فراكتسياسىنىڭ كەڭەيتىلگەن جيىنىندا تالقىلاندى.
ءسوز باسىندا ءماجىلىس سپيكەرى، «AMANAT» توراعاسى ەرلان قوشانوۆ لۋدومانيا ادام تاعدىرىنا بالتا شاباتىن قاۋىپتى قۇبىلىسقا اينالىپ بارا جاتقانىن اتاپ ءوتتى. وسىعان بايلانىستى، پارتيا ويىن بيزنەسى، بۋكمەكەرلىك كەڭسەلەر مەن لوتەرەيا قىزمەتتەرى بويىنشا زاڭ جوباسىن دايىنداۋعا باستاماشى بولدى.
«قازىرگى تاڭدا قازاقستاندا ويىنقۇمارلىق ىندەتتەي ءورشىپ، ۇلتتىق قاۋىپسىزدىككە قاتەر توندىرە باستادى. لۋدومانيا – ءححى عاسىردىڭ دەرتى. ميلليونداعان ادام قۇمار ويىنداردان زارداپ شەگەدى. بۇگىندە ءباس تىگۋ مەكتەپ قابىرعاسىنان باستالىپ جاتىر. بارلىق ويىن ونلاين، جۇرتشىلىققا وڭاي قولجەتىمدى. سوندىقتان مەملەكەت باسشىسى بۇل تاقىرىپتى قاۋىپسىزدىك كەڭەسىنىڭ وتىرىسىندا كوتەرىپ، قۇمار ويىنداردى شەكتەۋگە قاتىستى مىندەت قويدى. ەندى دەپۋتاتتار مۇنى زاڭ جۇزىندە بەكىتۋى كەرەك»، – دەدى ول.
ءوز كەزەگىندە، تۋريزم جانە سپورت ءمينيسترى ەرمەك مارجىقپاەۆ ءتۇسىندىرۋ جۇمىسىنىڭ ناتيجەسىندە 2021 جىلدان بەرى 17 بۋكمەكەرلىك كەڭسە ءوز ەركىمەن ليتسەنزياسىن قايتارعانىن، ال ويىن بيزنەسى سۋبەكتىلەرىنىڭ سانى 2 ەسەگە، 71-دەن 28-گە دەيىن قىسقارعانىن مالىمدەدى.
«بيىل ينتەرنەت-كازينولاردىڭ قىزمەتى مەن جارناماسىن شەكتەۋ ماقساتىندا «كيبەرنادزور» اقپاراتتىق جۇيەسى ارقىلى 7 مىڭعا جۋىق ينتەرنەت-رەسۋرس پەن زاڭسىز ماتەريالداردىڭ سىلتەمەسى بۇعاتتالدى. بۇگىندە ەل اۋماعىندا ويىن بيزنەسىمەن اينالىسۋعا رۇقسات ەتەتىن 28 ليتسەنزيا بەرىلگەن. ونىڭ ىشىندە، 5 كازينو، 8 ويىن اۆتوماتتارى زالى، 13 بۋكمەكەرلىك كەڭسە جانە 2 توتاليزاتور بار»، – دەدى مينيستر.
جيىن بارىسىندا دەپۋتاتتار مەملەكەتتىك ورگانداردىڭ لۋدومانيامەن جانە زاڭسىز ويىن بيزنەسىمەن كۇرەس جونىندەگى جۇمىسىن سىنعا الدى. ماسەلەن، قۇمار ويىننىڭ كەسىرىنەن 10 ەرلى-زايىپتىنىڭ 7-ەۋى اجىراسىپ جاتىر. بىلتىر قازاقستاندا 3676 ادام ءوز-وزىنە قول جۇمساعان، ونىڭ ءاربىر بەسىنشىسىنىڭ سەبەبى – لۋدومانيا.
«ۇكىمەت ويىن بيزنەسىن ۇيىمداستىرۋشىلار مەن ولاردىڭ لوببيستەرىنە قاتىستى قانداي دا ءبىر ناقتى شەشىم قابىلداپ جاتقانىن كورمەي وتىرمىز. بۋكمەكەرلىك كەڭسەلەر ينتەرنەتتەگى جانە باق-تاعى جارناماعا ميللياردتاعان تەڭگە قاراجات قۇيادى. الەۋمەتتىك جەلى بۋكمەكەرلىك كەڭسەلەردىڭ جارناماسىنا تولى. ودان قالسا، قوعام بەلسەندىلەرى مەن پىكىر كوشباسشىلارى بۇل سالانى دامىتۋعا دايىن. سوندىقتان «AMANAT» پارتياسى باستاماشىلىق ەتكەن زاڭ جوباسىن بارىنشا تەزىرەك قابىلداۋىمىز كەرەك»، – دەدى دەپۋتات ەدىل جاڭبىرشين.
بۇدان سوڭ، «AMANAT» فراكتسياسىنىڭ جەتەكشىسى ەلنۇر بەيسەنباەۆ دەپۋتاتتارعا جاڭا زاڭ جوباسىنىڭ اسا ماڭىزدى نورمالارى تۋرالى اقپارات بەردى. 2 كودەكسكە جانە 7 زاڭعا 50-دەن استام تۇزەتۋلەر دايىندالدى.
اتاپ ايتقاندا، اليمەنت، سالىق جانە نەسيە بويىنشا بورىشكەرلەر تىزىلىمىندە تۇرعان جەكە تۇلعالاردىڭ قۇمار ويىن ويناۋىنا تىيىم سالۋ ۇسىنىلادى. زاڭدى تۇلعالار رۇقسات ەتىلگەن جاسقا تولماعان ادامداردى قۇمار ويىنعا تارتقانى ءۇشىن اكىمشىلىك جاۋاپكەرشىلىككە، سونداي-اق ونلاين-كازينو ۇيىمداستىرعانى ءۇشىن قىلمىستىق جازاعا تارتىلادى. كوشەلەردە، ينتەرنەتتە جانە بۇقارالىق اقپارات قۇرالدارىندا بۋكمەكەرلىك كەڭسەلەر مەن توتاليزاتورلاردىڭ جارناماسى شەكتەلەدى.
سونىمەن قاتار، لوتوماتيكالىق ماشينالاردى ەلگە اكەلۋگە جانە تۇرعىن ۇيلەردە، دۇكەندەردە، مەديتسينالىق جانە ءبىلىم بەرۋ مەكەمەلەرىندە ورناتۋعا تىيىم سالۋ ۇسىنىلادى. قۇمار ويىن ويناۋعا بولاتىن جاس شەگى 25 جاسقا دەيىن ارتادى. ويىن بيزنەسىن ۇيىمداستىرۋشىلار ءوز اقپاراتتىق-قارجىلىق جۇيەلەرىن مەملەكەتتىك كىرىستەر ورگاندارىنىڭ اپپاراتتىق كەشەنىمەن بىرىكتىرۋى كەرەك. وسىلايشا، مەملەكەت بارلىق قارجىلىق وپەراتسيانى باقىلاپ وتىرادى.
فراكتسيا جيىنىن قورىتىندىلاي كەلە، ءماجىلىس سپيكەرى ەرلان قوشانوۆ زاڭ جوباسىن جۇرتشىلىقپەن جانە مۇددەلى مەملەكەتتىك قۇرىلىمدارمەن كەڭىنەن تالقىلاۋ قاجەت ەكەنىن ەسكەرە وتىرىپ، ونى تەزىرەك قابىلداۋدىڭ ماڭىزىن اتاپ ءوتتى. نەگىزگى ماقسات – ازاماتتاردى ويىنعا تاۋەلدىلىكتەن جانە وتباسىلاردى ونىڭ تەرىس سالدارىنان قورعاۋ.
«AMANAT» فراكتسياسىنىڭ دەپۋتاتتارى ۇسىنىلعان زاڭ جوباسىن ءبىراۋىزدان قولدادى.
