ارحەولوگتار قازاقستان اۋماعىندا ەڭ كونە ادام جەرلەنگەن مەكەندى انىقتادى. بۇل تۋرالى «قازاقستان ارحەولوگياسى» عىلىمي جۋرنالى جازدى، دەپ حابارلايدى «ادىرنا» ۇلتتىق پورتالى.
«شىعىس قازاقستاننىڭ جارتىلاي قۋاڭ دالا ايماعىندا ورنالاسقان كوكەن قالاشىعىندا جۇرگىزىلگەن قازبا جۇمىستارى كەزىندە قولا ءداۋىرىنىڭ تۇراعى نەگىزىندە جاتقان قات-قابات تاس ءداۋىرىنىڭ شوگىندىلەرى تابىلدى. ول ءبىزدىڭ داۋىرىمىزگە دەيىنگى VI مىڭجىلدىقتىڭ ورتاسى نەمەسە نەوليت داۋىرىنە جاتادى. بۇل قورىمنىڭ قازاقستان اۋماعىندا تابىلعانداردىڭ ىشىندەگى ەڭ كونە ەكەنىن دالەلدەيدى.»، - دەلىنگەن زەرتتەۋ اننوتاتسياسىندا.
قازبا جۇمىستارى بارىسىندا، ارحەولوگتار قازاقستاندا ءبىر-بىرىنە ۇقسامايتىن جەرلەۋ راسىمدەرىن تاپقان. قابىردە ەكى ادامنىڭ سۇيەگى بولعان. دنك ساراپتاماسى سۇيەكتەردىڭ ءجاسوسپىرىم مەن ەرەسەك ادامعا تيەسىلى ەكەنىن كورسەتكەن.
زەرتتەۋ جۇمىستارىن نازارباەۆ ۋنيۆەرسيتەتى ارحەولوگيا ينستيتۋتىنىڭ ارحەولوگتارى جۇرگىزدى – مارعۇلان، سەنت-لۋيستەگى ۆاشينگتون ۋنيۆەرسيتەتى (اقش) جانە پاۆلودار مەملەكەتتىك ۋنيۆەرسيتەتى. ولار جەرلەۋ ورىندارىنان قازاقستانداعى ەڭ كونە زامانعا جاتاتىن قاڭقالاردى تاپقان، سوندىقتان بۇل ايماقتا ءوندىرۋشى شارۋاشىلىق پايدا بولعانعا دەيىن اڭشى-جيناۋشىلار حالقىنىڭ شىعۋ تەگىن، ءومىر سالتىن جانە قۇرامىن زەرتتەۋگە ەرەكشە مۇمكىندىك بەرەتىنىن ايتادى.
«قازبا جۇمىستارى مەن تالداۋدان باستاپ ماتەريالدى جاريالاۋعا دەيىن بۇكىل پروتسەسس قازاقستاندىق جانە حالىقارالىق مامانداردان تۇراتىن ءبىزدىڭ كوماندانىڭ ءۇش جىلدان استام جۇمىسىن قامتىدى. بۇل جاڭالىق قازاقستاندىق ارحەولوگيا ءۇشىن وتە ماڭىزدى. قازاقستاندا تاس ءداۋىرىنىڭ ارحەولوگيالىق ماتەريالدارى وتە كوپ، بىراق بۇل جەردە ءبىز جەرلەنگەن ادام تۋرالى ايتىپ وتىرمىز. وسى جاڭالىقتىڭ ارقاسىندا بىزدە سول ايماقتى مەكەندەگەن ادامداردىڭ ءومىرىن زەرتتەۋگە مۇمكىندىك پايدا بولدى»، - دەپ اتاپ ءوتتى نازارباەۆ ۋنيۆەرسيتەتىنىڭ قاۋىمداستىرىلعان پروفەسسورى، ارحەولوگ پاۋلا دوۋماني ديۋپيۋي.
«ادىرنا» ۇلتتىق پورتالى
