27 مامىردا الماتىدا "قىتاي زەرتتەۋ ينستيتۋتى" ۇيىمىنىڭ وفيسىندە ءبىر توپ ادام ءباسپاسوز ماسليحاتىن وتكىزىپ، تۋىستارى ساياسي لاگەردەن بوساعانىمەن قازاقستانعا كەلە الماي وتىرعانىن ايتتى.
جيىندى ۇيىمداستىرۋشى قىدىرالى ورازۇلىنىڭ ايتۋىنشا، "قىتايداعى ساياسي ۇيرەنۋ لاگەرىنە قامالعانداردىڭ 90 پايىزعا جۋىعى بۇگىندە بوساپ شىققان. بىراق ولاردىڭ كەيبىرى قازاقستانعا كەلە الماي وتىر".
جيىنعا كەلگەندەر قازاقستان بيلىگىنەن "قىتايدان قايتا الماي وتىرعان تۋىستارىن ەلگە قايتارۋعا كومەك سۇرادى".
سولاردىڭ ءبىرى گۋلبانۋ راحىمقىزى كۇيەۋى راحمان راحىبايۇلىنىڭ لاگەردەن بىرنەشە اي بۇرىن شىققانىمەن، قازاقستانعا كەلە الماي وتىرعانىن ايتادى.
– كۇيەۋىم ىلە قازاق اۆتونوميالى وبلىسىنا قاراستى تولى اۋدانىندا. نەگىزگى ماماندىعى - مۇعالىم. قازىر جەرگىلىكتى مەكتەپتە كۇزەتشى بولىپ ءجۇر ەكەن. اقپان ايىنىڭ 20-سى كۇنى ىزدەپ باردىم. الدىمنان كۇتىپ العان پوليتسيا كۇيەۋىممەن بەتپە-بەت بىرنەشە ساعات جولىقتىردى. تۋىستارىمىزدىڭ ۇيىنە جىبەرمەدى. سول جەردەگى قوناق ۇيدە بولدىق. جولداسىم ەشتەڭە ايتا المادى. بار ايتقانى "مەندە ءبارى دۇرىس. سەن قايتا بەر" دەدى. بىراق كەلگەلى قايتىپ سويلەسە المادىم، - دەيدى ول.
قازاقستان سىرتقى ىستەر مينيسترلىگىنىڭ ازاتتىققا 21 مامىردا جولداعان رەسمي جاۋابىندا 2018 جىلى قىتايدا تۇراتىن 14324 ەتنيكالىق قازاق، 2019 جىلى العاشقى ءتورت ايدا 1929 ەتنيكالىق قازاق قازاقستان ازاماتتىعىن العان.
"قازاقستان سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ دەرەگىنشە، 2019 جىلى 1 قاڭتار-15 مامىرعا دەيىن قىتايداعى 6506 ەتنيكالىق قازاق (قىتاي ازاماتتارى) قازاقستاندا تۇراتىن تۋىستارىنا كەلۋ ءۇشىن ۆيزا الدى. ال مينيسترلىككە قىتايدان قازاقستانعا كەلۋ ءۇشىن كومەك سۇراعان 343 ءوتىنىش ءتۇستى" دەپ جازىلعان سىرتقى ىستەر مينيسترلىگىنىڭ جاۋابىندا.
مينيسترلىكتىڭ مالىمدەۋىنشە، قىتاي كوشى-قون زاڭناماسىن بۇزۋ فاكتىلەرى - ەتنيكالىق قازاقتاردىڭ قازاقستانعا شىعۋىنا نەگىزگى كەدەرگى. قىتاي كوشى-قون رەجيمىن بۇزباعان ەتنيكالىق قازاقتارعا پەكين تاراپىنان كەدەرگى جوق.
شىڭجاڭ ايماعىنداعى لاگەرلەر جايلى العاش رەت 2017 جىلدىڭ كوكتەمىندە ايتىلا باستاعان. بۇۇ شىڭجاڭداعى "ساياسي تاربيەلەۋ ورتالىقتارىندا" ميلليونعا جۋىق ادام "ەركىنەن تىس" قاماۋدا وتىرعانىن مالىمدەگەن. قىتاي ۇكىمەتى باسىندا بۇل ورتالىقتاردىڭ بارىن جوققا شىعارىپ كەلدى. كەيىن پەكين شىڭجاڭداعى ساياساتىن "ەكسترەميزمگە قارسى شارا" دەپ اتاپ، ادامدار ەركىنەن تىس وتىرعان لاگەرلەردى ء"تىل ۇيرەنىپ، كاسىپكە باۋليتىن " ورتالىقتار دەپ تۇسىندىرگەن.
"ازاتتىق" راديوسى
