Byltyr ǵana 10 jylǵa sottalǵan Kentaý qalasynyń burynǵy ákimi Dáýren Mahajanov bıyl túrmeden bosatyldy, dep habarlaıdy "Adyrna" tilshisi Otyrar.kz-ke silteme jasap.
Almaty qalasy, Almaty oblysy jáne Jetisý oblysy boıynsha Qylmystyq atqarý júıesi departamentiniń málimetinshe, "para aldy" degen kúdikke ilingen Kentaýlyq ákimniń bas bostandyǵynan aıyrý jazasy aıyppul tóleýge aýystyrylǵan.
2022 jyldyń shildesinde sot Mahajanovty 50 mıllıon teńge para alǵany úshin 10 jylǵa bas bostandyǵynan aıyrǵan bolatyn. Degenmen bir jyldan keıin Joǵarǵy sotta bas prokýratýranyń narazylyǵymen burynǵy sheneýniktiń jazasy alaıaqtyq retinde qaıta qaralǵan.
Derekterge súıensek, burynǵy ákim jábirlenýshiden aqshany para retinde almaǵan, jábirlenýshini aldap soqqan.
10 jylǵa úkim shyqqan Dáýren Mahajanovtyń "para alýǵa oqtalý" baby "alaıaqtyqqa oqtalý" bolyp qaıta qaralyp, ákimniń merzimi bes jylǵa deıin qysqartylǵan.
Al qyrkúıekte Mahajanov kolonııadan bosatylǵany aıtyldy. Eks-sheneýnik 1 mıllıon 988 myń teńge aıyppul tólep, bostandyqqa shyqqan.
"2023 jyldyń 8 qyrkúıeginde Qapshaǵaı qalalyq sotynyń bas bostandyǵynan aıyrý jazasyn aıyppulmen aýystyrý týraly qaýlysy negizinde sottalýshy D.Mahajanov Zarechnyı kentindegi №57 mekemeden shyǵaryldy", – dep habarlady Almaty oblysy boıynsha qylmystyq-atqarý júıesi ókilderi.
