سايلاۋ. قازىر حالىق باياعىداي ەمەس، باسقا!

2337

مەنىڭ دوستىعىمدا سايلاۋدا بويكوتتى قولداپ وتىرعان اعالار، ساياسي ساۋاتتى كىسىلەر بار ەكەن، ولاردىڭ ۇستانىمىنا قۇرمەتپەن قارايمىن. بىراق ول كىسىلەرگە كوكەيدە جۇرگەن ءبىر اۋىز ءسوزىمدى ايتا كەتسەم با دەيمىن. ونى ولار قالاي قابىلدايدى، وزدەرى ءبىلسىن. بۇنىمدى "جەلىدەگى اقىلسىنعان ءبىر كوگالا قىرتتىڭ اقىلى" دەپ شىرت تۇكىرىپ قويا سالسا دا رەنىشىم جوق.
مەنىڭشە ەلىمىزدە حالىق سوڭعى كەزدە تىم ساياسي بەلسەندى، بۇل فاكت. سوڭعى ەكى - ءۇش جىلدا بيلىك پەن حالىقتىڭ سىرت كوزگە بىلىنبەيتىن تەكەتىرەسى بولدى دا، ءبىزدىڭ بيلىك حالىقپەن كوپ كومپروميسسكە ءتۇسىپ، ءبىراز باسىمدىلىقتارىنان ايىرىلىپ قالدى.
قازىر الدەنەگە نارازى حالىق جينالا سالۋ دەگەن نارسە "شەس سەكۋنت" - سايراگۇلگە بىرىگە سالادى، كوپبالالى انالار اكىمدەردىڭ جاعالارىنان الىپ جاتىر، ودان ءارى جەر ميتينگىسى، ارمياندارعا نارازى بولسا دەگەنى بار، تاعى باسقا كوپتەگەن توپتاسۋ....
انا يۋتۋبكە ءبىر جارتى ساعات وتىرساڭىز جۇرت بىلمەيتىن نەبىر حالىقتىڭ توپتاسۋىن، ايقايىن، سوتىن، ۇرانىن ءبارىن كورەسىز.
حالىق ورەكپىپ ءجۇر.
مەنىڭ دالادا، كوشەدە، پويىزدا، ۇشاقتا كورەتىنىم - يۋتۋبتەگى وپپوزيتسيالىق ارنالاردى قوسىپ قويىپ، ورىسشا، قازاقشا سونى ۇيىپ تىڭداپ وتىرعان جۇرتشىلىق، سونى تالقىلاپ وتىرعان ادامدار.
تاكسيگە وتىرا قالسام، مىندەتتى تۇردە ساياسي نارازى تاكسيستكە وتىرىپ، "ساياسي ساۋاتىم اشىلادى". كوشەدە دە سول، بازاردا، دالادا، بۇكىل جەردە كۇڭكىلدەگەن حالىق. ال ينتەرنەت، جەلى، يۋتۋب ءتىپتى جارىلىپ جاتىر.
بۇل حالىق ۋجە وزىنە نە كەرەك ەكەنىن بىلەدى. " قۇلاننىڭ قاسۋىنا مىلتىقتىڭ باسۋى" دەمەكشى ەندى وسى سايلاۋ بۇل حالىقتىڭ ىڭعايىنا، تالابىنا وڭ كەلىپ وتىر. جالىندى وپپوزيتسيونەر بولماسا دا كانديداتتار اراسىنان بيلىككە قارسى كوزقاراستاعى قوسانوۆتى كورگەسىن، بۇعان دەيىن ءار ارنادا اققان سۋ، ءبىر ارناعا قۇيىلىپ حالىق قازىر تەلەگەي تەڭىزگە اينالىپ بارادى.
ەگەر بىزدەگى بيلىك وكىلدەرى وعان بوگەت قويىپ، وسى حالىقتى ارى قاراي بۇرىڭعىداي الداپ - سۋلاپ، ۋقيت - سۋقيت قىلىپ باسقارىپ وتىرا بەرەمىز دەپ ويلايتىن بولسا، ولار قاتتى قاتەلەسەدى جانە سونداي تاياز ويى مەن اقىماقتىعى ءۇشىن بۇلار ودان (حالىقتان) مىقتاپ تاياق جەيدى. سەبەبى، (مەن مىنانى ۇلكەن ارىپتەرمەن جازىپ قويايىن) قازىر حالىق باياعىداي ەمەس، باسقا! وزگەرىپ كەتتى!
ەندى ەكى جاق وسىنداي جاعدايدا وتىرعان تۇستا بۇل سايلاۋ بيلىكتى قاتتى ساستىرىپ وتىر، بۇعان دا كۇمانىم جوق.
سوندىقتان قوسانوۆ داۋى، ءتىپتى سول قوسانوۆتىڭ ءوزى اڭداماي الدەبىر پروتسەسستەردىڭ باستاماسى بولىپ كەتۋى مۇمكىن. بۇنى دا ەسكەرىڭىزدەر. ءامىرجان مۇمكىن ناشار ساياساتكەر بولار، بىراق ونىڭ ارتىنا كادىمگىدەي ورەكپىگەن، اسقان - توسقان تەلەگەي تەڭىز جينالىپ قالدى، بۇل فاكتورمەن ساناسۋ كەرەك. ويتكەنى جۇمىر جەر بەتىندە ءبىر ماقساتپەن بىرىگىپ، الدەنەگە بەتالعان تەڭىزدەي تولقىعان حالىقتى جەڭگەن كۇش جوق.

ولجاس ءابىل

پىكىرلەر