شاحتادا قازا تاپقان 17 كەنشىنىڭ بالاسى مەملەكەتتەن جاردەماقى الادى

1404
Adyrna.kz Telegram
فوتو: egemen.kz
فوتو: egemen.kz

الەۋمەتتىك ەڭبەك جانە حالىقتى الەۋمەتتىك قورعاۋ مينيسترلىگى كوستەنكو اتىنداعى شاحتاداعى جارىلىستان قازا تاپقان ون جەتى كەنشىنىڭ وتباسىنا جاردەماقى تاعايىنداعانىن مالىمدەدى، دەپ حابارلايدى “ادىرنا” ۇلتتىق پورتالى.

اقپاراتقا سايكەس، قايتىس بولعان 46 كەنشىنىڭ 21-ءىنىڭ قامقورلىعىنداعىلارعا الەۋمەتتىك قولداۋدىڭ كەلەسى تۇرلەرى كورسەتىلەدى:

1. رەسپۋبليكالىق بيۋدجەت قاراجاتى ەسەبىنەن اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقى.

وسى جاردەماقىنىڭ مولشەرى قايتىس بولعان ادامنىڭ اسىراۋىنداعى ادامداردىڭ سانىنا قاراي ايقىندالادى جانە ولاردىڭ اي سايىنعى مولشەرى 37 322 تەڭگەدەن (1 بالاعا) 111 560 تەڭگەگە دەيىن (5 بالاعا) بولادى.

جاردەماقىنىڭ بۇل ءتۇرى 8 جاسقا دەيىنگى بالا كۇتىمىن جۇزەگە اسىراتىن جۇمىس ىستەمەيتىن انالارعا دا تاعايىندالدى.

2. مەملەكەتتىك الەۋمەتتىك ساقتاندىرۋ قورىنىڭ (بۇدان ءارى – ماسق) قاراجاتى ەسەبىنەن اسىراۋشىسىنان ايىرىلۋ جاعدايى بويىنشا الەۋمەتتىك تولەم.

بۇل تولەمنىڭ مولشەرى قايتىس بولعان ادامنىڭ تابىسى مەن ونىڭ الەۋمەتتىك ساقتاندىرۋ جۇيەسىنە قاتىسۋ ءوتىلى نەگىزىندە انىقتالادى. تولەمدەر مولشەرى ايىنا 56 مىڭ تەڭگەدەن 272 مىڭ تەڭگەگە دەيىنگى ارالىقتى قۇرايدى.

قولدانىستاعى زاڭناماعا سايكەس اسىراۋشىسىنان ايىرىلۋ جاعدايى بويىنشا تولەمدەر بالالار 18 جاسقا تولعانعا دەيىن، ال جوعارى وقۋ ورىندارىندا كۇندىزگى بولىمدە وقىعان جاعدايدا 23 جاسقا دەيىن تولەنەتىنىن ەستەرىڭىزگە سالامىز.

ايتا كەتۋ كەرەك، جاردەماقىلار مەن الەۋمەتتىك تولەمدەر قايتىس بولۋ تۋرالى كۋالىك نەگىزىندە تاعايىندالادى. بۇل باعىتتاعى جۇمىس جالعاسۋدا جانە قر ەڭبەك جانە حالىقتى الەۋمەتتىك قورعاۋ مينيسترلىگىنىڭ، ماسق جانە «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق باقىلاۋىندا.

پىكىرلەر