تورت اكىمدى پىشاقتادى ما؟

1895
Adyrna.kz Telegram

قاراعاندى وبلىسى اكىمىنىڭ ورىنباسارى الماس ايداروۆ تاڭعى بەستە تورت كەسىپ جاتىپ، پىشاق ابايسىزدا كەۋدەسىنە كىرىپ كەتكەن دەگەن اقپارات الەۋمەتتىك جەلىدە جەلدەي ەسكەن بولاتىن.  الماس ايداروۆتىڭ جارالانىپ قالعانى جونىندەگى اقپارات قاراعاندى قالالىق پوليتسيا بولىمىنە 26 مامىر كۇنى ساعات 05.30-دا تۇسكەن.
شەنەۋنىكتىڭ  بەرگەن تۇسىنىكتەمەسى بويىنشا، ول تورت كەسىپ جاتقاندا قولى تايىپ كەتىپ، كەۋدەسىنىڭ سول جاق تۇسىن پىشاقپەن جاراقاتتاپ العان ەكەن. ءتارتىپ ساقشىلارىنىڭ ايتۋىنشا، وبلىس اكىمىنىڭ ورىنباسارى ەشكىمگە كىنا ارتپاعان، قانداي دا ءبىر ارىز-شاعىم جازۋدان باس تارتقان.

وقىس وقيعا تۋرالى ا.ايداروۆتىڭ ءوزى فەيسبۋك جەلىسىندەگى پاراقشاسىندا مىناداي جازبا قالدىردى:

«دوستار، مەنىڭ دەنساۋلىعىم تۋرالى اقپاراتقا بايلانىستى كوپتەگەن قوڭىراۋلار ءتۇسىپ جاتىر. ۋايىمداعاندارىڭىزعا راحمەت! مەندە ءبارى جاقسى – كادىمگى ۇيدەگى جاراقات. كەشكە قاراي بايقاماي كەسىپ الدىم، تۇندە قاناي بەرگەن سوڭ، تاڭ اتقانىن كۇتپەستەن جەدەل جاردەم شاقىرۋعا تۋرا كەلدى».

وبلىس اكىمىنىڭ ءباسپاسوز قىزمەتىنە حابارلاسقانىمىزدا  ايداروۆتىڭ جاعدايىنا الاڭداۋعا ەشقانداي نەگىز جوق ەكەنىن. قازىر وبلىس اكىمىنىڭ ورىنباسارى جۇمىستا ەكەنىن حابارلادى.

35 جاستاعى الماس ايداروۆ 2017 جىلدىڭ 28 ماۋسىمىنان باستاپ قاراعاندى وبلىسى اكىمىنىڭ ونەركاسىپ، شاعىن جانە ورتا بيزنەستى دامىتۋ، يندۋستريالاندىرۋ جانە ينۆەستيتسيا جونىندەگى ورىنباسارى قىزمەتىن اتقارىپ كەلەدى.

"ادىرنا" ۇلتتىق پورتالى

پىكىرلەر