«ارسەلور ميتتال تەمىرتاۋ» كومپانياسىنىڭ جاڭا باسشىسى ۆاديم باسين ۆيدەو ۇندەۋ جاريالادى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ تاپسىرماسىمەن «ارسەلور ميتتال تەمىرتاۋ» كومپانياسىن تىزگىندەگەن ۆاديم باسين ۆيدەو ۇندەۋ ارقىلى الداعى جوسپارمەن ءبولىستى.
«كەشە مەملەكەت باسشىسى قازا تاپقان جانە زارداپ شەككەن كەنشىلەردىڭ تۋعان-تۋىستارىمەن كەزدەسكەن كەزدە ينۆەستورمەن سەرىكتەستىك توقتايتىنىن جاريالادى. سونىمەن قاتار، كومپانيانىڭ بۇكىل ۇجىمىنا حابارلانعانى – ەڭبەك جاعدايى، جالاقى، الەۋمەتتىك كەپىلدىكتەر، ەشتەڭە قىسقارمايدى، الىنىپ تاستالمايدى. سول شارتتار قالادى ءارى البەتتە، ولاردى جەتىلدىرۋ ىستەرى قاراستىرىلادى. بۇل – كومپانيانىڭ جۇمىسىن جالعاستىرۋ جانە الەۋمەتتىك جاۋاپكەرشىلىكتى سەزىنۋدە كەرەكتى شارت. سول سەبەپتى ۇجىمنىڭ بىردە-ءبىر مۇشەسى جۇمىستان شىعارىلمايدى، كوماندانىڭ بىردە-ءبىر مۇشەسىنىڭ قۇقىعى شەكتەلمەيدى»، – دەدى ۆاديم باسين.
جاڭا باسشىنىڭ ايتۋىنشا، كومىر كەندەرىندە ەڭ باستى نازار قاۋىپسىزدىكتى كۇشەيتۋگە باعىتتالماق.
سوڭعى اقپارات بويىنشا قىرىق ءۇشىنشى كەنشىنىڭ دەنەسى تابىلدى.
