«Arselor Mıttal Temirtaý» kompanııasynyń jańa basshysy Vadım Basın vıdeo úndeý jarııalady, dep habarlaıdy "Adyrna" ulttyq portaly.
Prezıdenttiń tapsyrmasymen «Arselor Mıttal Temirtaý» kompanııasyn tizgindegen Vadım Basın vıdeo úndeý arqyly aldaǵy josparmen bólisti.
«Keshe Memleket basshysy qaza tapqan jáne zardap shekken kenshilerdiń týǵan-týystarymen kezdesken kezde ınvestormen seriktestik toqtaıtynyn jarııalady. Sonymen qatar, kompanııanyń búkil ujymyna habarlanǵany – eńbek jaǵdaıy, jalaqy, áleýmettik kepildikter, eshteńe qysqarmaıdy, alynyp tastalmaıdy. Sol sharttar qalady ári álbette, olardy jetildirý isteri qarastyrylady. Bul – kompanııanyń jumysyn jalǵastyrý jáne áleýmettik jaýapkershilikti sezinýde kerekti shart. Sol sebepti ujymnyń birde-bir múshesi jumystan shyǵarylmaıdy, komandanyń birde-bir múshesiniń quqyǵy shektelmeıdi», – dedi Vadım Basın.
Jańa basshynyń aıtýynsha, kómir kenderinde eń basty nazar qaýipsizdikti kúsheıtýge baǵyttalmaq.
Sońǵy aqparat boıynsha qyryq úshinshi kenshiniń denesi tabyldy.
