مەيىرىمدىلىك - ادام بويىنداعى ەڭ ىزگى قاسيەتتەردىڭ ءبىرى. تۇركىستان وبلىسى، تۇلكىباس اۋدانىنداعى اباي مەكتەپ-ليتسەيىنىڭ 1999 جىلى مەكتەپ بىتىرگەن تۇلەكتەرى 4 بالانى جالعىز ءوزى تاربيەلەپ وتىرعان اناعا اۋدان ورتالىعى ت.رىسقۇلوۆ اۋىلىنان 4 بولمەلى ءۇي الىپ بەرىپ، قۋانىشقا بولەدى.
قۋانىشقا كەنەلگەن يۋسۋپوۆا نازيرا جاپارقۇلقىزى كوپ جىلدان بەرى باسپاناعا قول جەتكىزە الماي جۇرگەن بولاتىن. نازيرا اپاي قاسيەتتى رامازان ايىندا مەكتەپ بىتىرگەندەرىنە 20 جىل تولعانىن يگى ىسپەن ورنەكتەگەن تۇلەكتەردىڭ سىيىنا العىسى شەكسىز ەكەنىن جەتكىزدى. بۇل قايىرىمدىلىق شاراسى "التىن ۇيام" جوباسى اياسىندا ءوتىپ وتىر.
ميچۋرين سوۆحوزىندا جۇمىسشى بولىپ قىزمەت اتقارعان نازيرا جاپارقۇلقىزى سول ماڭايداعى تاۋساعىز اۋىلىندا جالدامالى پاتەردە تۇرعان. بۇگىنگى تاڭدا بالا كۇتىمىمەن ۇيدە وتىر.
بۇنداي يگى شارا تۇلكىباس اۋدانىندا ءبىرىنشى رەت ورىن الىپ وتىرعان جوق. بىلتىر ءدال وسى اباي مەكتەپ- ليتسەيىنىڭ 1998 جىلى بىتىرگەن تۇلەكتەرى 7 بالاسى بار جالعىز باستى اناعا اۋدان ورتالىعىنان ءتورت بولمەلى ءۇيدى سىيعا تارتقان بولاتىن. وسىنداي قايىرىمدىلىق شارالارى 20 جىلدىقتى اتاپ وتەتىن تۇلەكتەر اراسىندا داستۇرگە اينالعانداي.
