نازارباەۆ قورى كتك-نىڭ 1% اكتسياسىنان ايىرىلدى. بۇل تۋرالى Bes.media Telegram-ارناسى جازدى، دەپ حابارلايدى «ادىرنا» ءتىلشىسى.
«الماتىنىڭ مامانداندىرىلعان اۋدانارالىق ەكونوميكالىق سوتى بوستاندىق اۋدانى پروكۋراتۋراسىنىڭ «كوممەرتسيالىق تەلەۆيزيالىق ارنا» اق اكتسيالارىنىڭ 1%-ىن سىيعا تارتۋ شارتىن جارامسىز دەپ تانۋ تۋرالى تالابىن قاناعاتتاندىردى. بۇل ۇلەس بۇرىن «ماڭعىستاۋمۇنايگازعا»، ال سودان سوڭ نۇرسۇلتان نازارباەۆ قورىنا تيەسىلى بولعان»،– دەلىنگەن حابارلامادا.
«ماڭعىستاۋمۇنايگاز» كتك-نىڭ 1% اكتسياسىنا يە بولعان كەزدە اۋكتسيوندا بەيىندى ەمەس اكتيۆتى ساتپاق بولعان. الايدا ساتىپ الۋشىلار بولماعاندىقتان، ول ارناعا سىيعا تارتىلىپتى. كەيىننەن بۇل اكتسيا نۇرسۇلتان نازارباەۆ قورىنا بەرىلگەن. سىيعا تارتۋ تۋرالى كەلىسىمگە 2015 جىلدىڭ 29 جەلتوقسانىندا قول قويىلعان.
بيىل پروكۋراتۋرا اكتسيانى تەگىن بەرۋگە بولمايتىنىن العا تارتىپ، سوتقا جۇگىنگەن.
2023 جىلدىڭ 27 قازانىندا سۋديا ءىس بويىنشا شەشىم قابىلدادى.
«الماتى قالاسى بوستاندىق اۋدانى پروكۋراتۋراسىنىڭ تالاپ ارىزى قاناعاتتاندىرىلسىن. 2015 جىلدىڭ 29 جەلتوقسانىندا «ماڭعىستاۋمۇنايگاز» اق مەن «كوممەرچەسكي تەلەۆيزيوننىي كانال» اق (كتك تەلەارناسى — رەد.) اراسىنداعى كەلىسىمشارت جارامسىز دەپ تانىلسىن»، – دەدى سۋديا گاۋحار قاسىمباەۆا.
ايتا كەتەيىك، قوس تاراپ شەشىمگە كەلىسپەگەن جاعدايدا ءبىر اي ىشىندە اپەللياتسيالىق شاعىم تۇسىرە الادى.
