مەملەكەت باسشىسى قاسىم-جومارت توقاەۆ جەتىسۋ وبلىسىنىڭ ورتالىعىندا سالىنىپ جاتقان جاڭا شاعىن اۋداندا بولىپ، قۇرىلىس بارىسىمەن تانىستى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
تالدىقورعان قالاسىنىڭ اكىمى ەرنات ءبازىلدىڭ ايتۋىنشا، وسى شاعىن اۋداندا بىلتىر اۋماعى 44,1 مىڭ شارشى مەتر بولاتىن 509 پاتەرلى 14 ءۇيدىڭ قۇرىلىسى اياقتالعان. ال بيىل جىل سوڭىنا دەيىن 783 پاتەرلى تاعى 21 ءۇيدى اياقتاۋ جوسپارلانىپ وتىر. قالا باسشىلىعى قالعان 218 پاتەرلى 6 ءۇيدىڭ قۇرىلىسىن كەلەسى جىلى اياقتايتىنىن جەتكىزدى. جىل سوڭىنا دەيىن تالدىقورعان قالاسى بويىنشا جالپى كولەمى 155,2 مىڭ شارشى مەتردى قۇرايتىن 2 065 پاتەر پايدالانۋعا بەرىلەدى. سونداي-اق 2024 جىلى 2 375 پاتەر سالۋ جوسپارلانعان. بۇدان بولەك، قاراتال وزەنىنىڭ وڭ جاعالاۋىن دامىتۋ قاراستىرىلعان.
قالا اكىمىنىڭ مالىمەتىنشە، جاڭا شاعىن اۋدانداردا الداعى ۋاقىتتا 28 مىڭنان استام ادام تۇرادى دەپ بولجام جاسالىپ وتىر. بۇل – قالا حالقىنىڭ 14 پايىزى. وسى ماسەلەلەردى ەسكەرە كەلە، ازاماتتاردىڭ جايلى تۇرمىسىن قامتاماسىز ەتۋ ءۇشىن قۋاتى ساعاتىنا 50 گكال بولاتىن گاز قازاندىعىن، سونداي-اق وسى شاعىن اۋدانعا 1200 ورىندىق مەكتەپ سالۋ قاجەتتىگى تۋرالى ايتىلدى.
كەزدەسۋ سوڭىندا پرەزيدەنت ۇكىمەتكە اتالعان ماسەلەلەردى زەردەلەپ، ءتيىمدى شەشىم قابىلداۋدى تاپسىردى.
