قازاقستان پرەزيدەنتى قاسىم-جومارت توقاەۆ اباي قۇنانبايۇلىنىڭ تۋعانىنا 180 جىل تولۋىنا ارنالعان سالتاناتتى ءىس-شارا قاتىسۋشىلارىنا قۇتتىقتاۋ ءسوزىن جولدادى.
مەملەكەت باسشىسى ابايدى ء«تول مادەنيەتىمىزدى دامىتۋعا ولشەۋسىز ۇلەس قوسقان الەمدىك دەڭگەيدەگى كەمەڭگەر تۇلعا» دەپ اتاپ، ونىڭ شىعارماشىلىعى حالقىمىزدىڭ سانا-سەزىمىن جاڭعىرتىپ، ۇلتتىق رۋحتى اسقاقتاتقانىن ايتتى.
پرەزيدەنتتىڭ ايتۋىنشا، ابايدىڭ ولەڭدەرى مەن قارا سوزدەرى وسكەلەڭ ۇرپاقتى بىلىمپازدىققا، ەڭبەكقورلىققا، ادالدىققا ۇندەپ، ەل مۇددەسى ءۇشىن قىزمەت ەتۋدىڭ ۇلگىسىن كورسەتەدى.
«ابايدىڭ مول مۇراسى – قازاق حالقىنىڭ عانا ەمەس، بارشا ادامزاتتىڭ اسىل قازىناسى. ونىڭ وسيەتتەرى ەشقاشان وزەكتىلىگىن جوعالتپايدى»، – دەدى توقاەۆ.
سونداي-اق ول اباي تۋعان ءوڭىردىڭ شاكارىم قۇدايبەردىۇلى، مۇحتار اۋەزوۆ سەكىلدى ۇلى تۇلعالارمەن بىرگە ۇلتتىق قۇندىلىقتاردىڭ ورتالىعى ەكەنىن اتاپ ءوتتى. مەملەكەت بۇل ايماقتى دامىتۋعا ەرەكشە ءمان بەرەتىنىن جەتكىزدى.
قاسىم-جومارت توقاەۆ قۇتتىقتاۋىن «ۇلى ابايدىڭ اماناتىنا ادال بولايىق!» دەگەن سوزبەن تۇيىندەدى.
