Memleket basshysy Qasym-Jomart Toqaev Jetisý oblysynyń ortalyǵynda salynyp jatqan jańa shaǵyn aýdanda bolyp, qurylys barysymen tanysty. Bul týraly Aqorda málimdedi, dep habarlaıdy “Adyrna” ulttyq portaly.
Taldyqorǵan qalasynyń ákimi Ernat Bázildiń aıtýynsha, osy shaǵyn aýdanda byltyr aýmaǵy 44,1 myń sharshy metr bolatyn 509 páterli 14 úıdiń qurylysy aıaqtalǵan. Al bıyl jyl sońyna deıin 783 páterli taǵy 21 úıdi aıaqtaý josparlanyp otyr. Qala basshylyǵy qalǵan 218 páterli 6 úıdiń qurylysyn kelesi jyly aıaqtaıtynyn jetkizdi. Jyl sońyna deıin Taldyqorǵan qalasy boıynsha jalpy kólemi 155,2 myń sharshy metrdi quraıtyn 2 065 páter paıdalanýǵa beriledi. Sondaı-aq 2024 jyly 2 375 páter salý josparlanǵan. Budan bólek, Qaratal ózeniniń oń jaǵalaýyn damytý qarastyrylǵan.
Qala ákiminiń málimetinshe, jańa shaǵyn aýdandarda aldaǵy ýaqytta 28 myńnan astam adam turady dep boljam jasalyp otyr. Bul – qala halqynyń 14 paıyzy. Osy máselelerdi eskere kele, azamattardyń jaıly turmysyn qamtamasyz etý úshin qýaty saǵatyna 50 Gkal bolatyn gaz qazandyǵyn, sondaı-aq osy shaǵyn aýdanǵa 1200 oryndyq mektep salý qajettigi týraly aıtyldy.
Kezdesý sońynda Prezıdent Úkimetke atalǵan máselelerdi zerdelep, tıimdi sheshim qabyldaýdy tapsyrdy.
