قىرعىزستاندا بۇرىنعى كۇيەۋى مۇرنى مەن قۇلاعىن كەسىپ العان اسەل نوعويباەۆانى قولداۋ ماقساتىندا «مەن اسەل» فلەشموبى باستالدى. بۇل تۋرالى جەلىدە ۆيدەو تارادى، دەپ حابارلايدى “ادىرنا” ۇلتتىق پورتالى.
جابىرلەنۋشىنىڭ اپكەسى ديانا ەلكەن 29 قازاندا بىشكەكتە تۇرمىستىق زورلىق-زومبىلىق تۋرالى ءفيلمنىڭ قايىرىمدىلىق كورسەتىلىمى وتەتىنىن حابارلادى. تۇسكەن قاراجات اسەلگە الداعى وپەراتسيالار ءۇشىن بەرىلەدى.
ايتا كەتەيىك، 36 جاستاعى قىرعىزستاندىق اسەل نوگويباەۆا بۇرىنعى كۇيەۋىنىڭ ۇنەمى ۇرىپ-سوعۋىنىڭ سالدارىنان اجىراسىپ كەتكەن بولاتىن. اجىراسقاننان كەيىن بۇرىنعى كۇيەۋى اسەلدى ۇيىندە، جۇمىس ورنىندا، قوعامدىق ورىنداردا كۇتىپ الىپ، ۇرىپ-سوعۋىن جالعاستىرعان. اسەلدىڭ ايتۋىنشا، وتباسى بىرنەشە رەت پوليتسياعا حابارلاسقان، بىراق ناتيجە بولماعان.
21 قىركۇيەكتە اسەل نوعويباەۆا پىشاق جاراقاتىمەن اۋرۋحاناعا تۇسكەن. بۇرىنعى كۇيەۋى ونىڭ مۇرنى مەن قۇلاعىن كەسىپ تاستاعان. اسەلدىڭ كامەلەتكە تولماعان ۇلدارىنىڭ ءبىرى قىلمىستىڭ كۋاسى بولعان.
اتالعان فاكتى قىرعىز رەسپۋبليكاسى قىلمىستىق كودەكسىنىڭ 130-بابى «دەنساۋلىققا اۋىر زيان كەلتىرۋ» بويىنشا تىركەلدى. ونىڭ بۇرىنعى كۇيەۋىنىڭ ۇستىنەن قىلمىستىق ءىس قوزعالدى.
