دوحادا Qatar Masters Open ءتۋرنيرىنىڭ ەكىنشى اينالىمىندا الەم چەمپيونى، دۇنيە جۇزىندەگى ءۇشىنشى شاحماتشى سانالاتىن نورۆەگيالىق ماگنۋس كارلسەندى سەنساتسيالىق تۇردە جەڭگەن 23 جاستاعى الىشەر سۇلەيمەنوۆ شاحماتقا قالاي كەلدى، بۇل سالاداعى العاشقى قادامى قانداي بولدى؟ ادىرنا ءتىلشىسى سۇحباتتاسىپ كوردى.
- «الەم چەمپيونىن» جەڭگەن ساتتەگى العاشقى اسەرىڭىزبەن بولىسسەڭىز؟
- شىنىمدى ايتسام ويىننىڭ سوڭعى مينۋتتارىندا دەيىن، ءتىپتى مەنىڭ جەڭگەنىمدى حابارلاعانعا دەيىن سەنە المادىم. قاتتى قوبالجىدىم ويتكەنى مەن ۇزدىك شاحماتشىمەن باق سىناستىم. جۋرناليستەر سۇحبات بەرۋىمدى سۇرادى، بىراق مەن وزىمە كەلە الماي ۋاقىت بەرۋىن سۇرادىم.
- شاحماتقا قالاي كەلدىڭىز، نەشە جاستان باستاپ جارىستارعا قاتىستىڭىز؟
- مەن شاحماتقا 9 جاسىمدا كەلدىم. دەگەنمەن بۇل شاحمات ءۇشىن تىم كەش سانالادى. ادەتتە 6 جاس ەڭ وڭتايلى ۋاقىت. مەن قازاقستاندىق، حالىقارالىق تۋرنيرلەرگە تەز شىعىپ كەتتىم. ءيا كەش باستاعانىما قاراماي 1 جىلدا جاقسى ناتيجەگە قول جەتكىزدىم.
- وتباسىڭىز تۋرالى ايتا وتىرساڭىز. باۋىرلارىڭىز بولسا، ولار دا سپورتقا جاقىن با؟
- مەن وتباسىدا جالعىز ۇلمىن. بىراق تۋىس اعا، باۋىرلارىم وتە كوپ. اكەم شاحماتپەن اينالىسپاعان، الايدا كىشكەنتاي كەزىمنەن وسى سپورت تۇرىنە باۋلىدى. ياعني قانىمىزدا كاسىپقوي شاحماتشىلار جوق. ونىڭ ۇستىنە مەن شاحماتقا كەزدەيسوق كەلدىم. دوسىم شاقىرعان جانە بۇل ماعان قاتتى ۇنادى.
- مەملەكەتتەن قانداي دا ءبىر قولداۋ رەتىندە تولەم تولەنە مە؟
- مەملەكەتتەن قولداۋ بار. مەن قازاقستان ەرلەر قۇراماسىنىڭ مۇشەسىمىن. قازاقستاندا رەيتينگ بويىنشا ەكىنشى شاحماتشىمىن. سونىمەن قاتار قازاقستان شاحمات فەدەراتسياسى دا قولداۋ كورسەتەدى. بۇل ماعان جاقسى كومەكتەسەدى، ارى قاراي جىلجۋىما ءوز سەپتىگىن تيگىزۋدە.
- الداعى ۋاقىتتا قانداي جوسپارلارىڭىز بار؟ شاكىرت تاربيەلەۋ ويدا بار ما؟
- شاكىرت تاربيەلەۋ ويىمدا جوق (كۇلدى) بىراق الدىعا ۋاقىتتا شاحمات مەكتەبىن اشقىم كەلەدى. ارينە الدىمەن مەن ءوزىمنىڭ دەڭگەيىمدى ءوسىرىپ، بەلەستەردى باعىندىرۋىم ءۇشىن توقتاماي جۇمىس جاساۋىم كەرەك.
- اشىق ءارى شىنايى جاۋاپ بەرگەنىڭىز ءۇشىن راحمەت! الار اسۋلارىڭىز كوپ بولسىن!
سالتانات ەربولات
