ءماجىلىس دەپۋتاتى داۋلەت مۇقاەۆ مەكتەپ وقۋشىلارىنا ۇلتتىق كيىم ۇلگىسىندەگى مەكتەپ فورماسىن تارتۋ ەتتى، دەپ جازادى “ادىرنا” ۇلتتىق پورتالى. ۆيدەونى داۋلەت مۇقاەۆ ءوز پاراقشاسىندا ءبولىستى.
استانا قالاسى N89 مەكتەپ-ليتسەيىنىڭ 2 “ۆ” سىنىبىنىڭ وقۋشىلارى ۇلتتىق ناقىشتاعى مەكتەپ فورماسىن كيدى. دەپۋتات ءوز جازباسىندا اتالعان باستامانىڭ اتا-انالاردىڭ ءبىراۋىزدان كەلىسىمىمەن ىسكە اسقانىن ايتتى. سىنىپ جەتەكشىلەرى تەڭدىك سارسەنقىزىنىڭ ۇلتجاندى، پاتريوت جان ەكەنىن دە اتاي كەتتى ول:
“وتكەن ايدا اتا-انالار جينالىسىندا بالالارىمىز وسىلاي ۇلتتىق ناقىشتا كيىنسە قالاي بولادى ەكەن دەپ ءوزارا داۋىسقا سالىپ ەدىك، ەشكىم قارسى بولمادى. ۇلتتىق كيىم، ءتىل، قازاق دەسە ارقام قوزىپ كەتەتىنىم بار ەمەس پە. بۇل مەنىڭ 30 وقۋشىعا جاساعان جەكە سىيلىعىم. رەسپۋبليكا كۇنىنە وراي دايىن بولسا ەكەن دەپ ءجۇر ەدىم، ۇلگەردىك. سىنىپتىڭ بەلسەندى اتا-انالارىنا راقمەت. سەبەبى مەنىكى تەك دەمەۋشىلىك)) ال ونى ۇيىمداستىرۋ، كەلىسۋ، ولشەۋ ول ءبىر ۇلكەن جۇمىس. جەتەكشىمىز تەڭدىك ساركەنقىزى وتە پاتريوت ۇستاز. سىنىپ تەك قازاق تىلىندە سويلەيدى. بۇگىنگى تاڭىمىز وسىلاي باستالدى. كەلە جاتقان رەسپۋبليكا كۇنى قۇتتى بولسىن” دەپ جازدى ول.
