Qazaqstandyq sportshy Esentaı Qaparuly Ardagerler arasyndaǵy álem chempıonatynda top jaryp, qos júldemen oraldy, dep habarlaıdy "Adyrna" tilshisi.
2023 jyly 17 qazanda Greııa memleketi Lýtrakı qalasynda ótken Ardagerler arasyndaǵy Erkin kúresten álem chempıonatynda altyn medal ıegeri atanyp, kók baıraǵymyzdy jarys tórinde jelbiretti.
Sondaı-aq, grek-rım kúresi boıynsha da beldesip, fınalda Mysyrdyń ataqty sportshysy, grek-rım jáne frıstaıl sheberi, Olımpıada oıyndarynyń chempıony jáne júldegeri, Álem chempıony, ataqty ańyz palýan Karam Gabermen taıtalasty. Jerlesimiz bul saıysta kúmis júlde ıegeri atanyp, elge oraldy.
Búginde 45 jastaǵy palýan 7 balanyń ákesi, Respýblıkalyq sport kolledjinde aǵa jattyqtyrýshy. Esentaı Qaparuly:
"Sportpen es bilgeli aınalysyp kelemin. Kúreste 19 jasymnan beri júrmin. Qazirgi tańda qaramaǵymda 60-qa jýyq oqýshym bar. Kóp oqýshylarym erkin kúresten Ulttyq quramada óner kórsetip júr",-deıdi.
Degenmen, Esentaı Qaparulynyń ápkesi elimizde" sportshylarǵa laıyqty jaǵdaı jasalmaıdy" dep narazy.
"- Jylda baýyrym úlken jarystarǵa qatysady. Úkimetten qoldaý bolmaı tur. Óziniń jeti balasy bar. Alǵashqy balalary tórtem. Alty qyz, bir balasyn asyraý qajet. Biraq balalarynyń aýzynan jyryp, osyndaı jarystarǵa barlyq shyǵyndy óz qaltasynan tóleýge májbúr. Menińshe, elimizde sportshylarǵa jaǵdaı jasalýy tıis. Osyny tyńdap, eskeretin adam bolsa",- deıdi Baqshagúl Qapar.
Kók týymyzdy kókke jelbiretken sportshyny áýejaıdan kútip alýǵa 80 jastaǵy ata-anasy men barsha týǵan-týystary, dostary jınalǵan.
Talantty sportshy 2022 jyly Bolgarııa memleketi Plovdıv qalasynda ótken álem chempıonatynda erkin kúresten Ardagerler arasynda baq synap, "álem chempıony" atanǵan.
Esentaı Qaparuly áli talaı saıystarda óner kórsetip, myqty shákirtterdi tárbıeleýdi kózdep otyr.