ساۋدا جانە ينتەگراتسيا مينيسترلىگى باق-تا جاريالانعان رەسەيگە تاۋارلاردىڭ 106 ءتۇرىن ساتۋعا تىيىم سالىنعانى تۋرالى اقپاراتتى جوققا شىعاردى، دەپ حابارلايدى «ادىرنا» ءتىلشىسى.
باسقارمانىڭ ايتۋىنشا، قازاقستان مەن رەسەيدىڭ ساۋدا قاتىناستارىن رەتتەۋ ەۋرازيالىق ەكونوميكالىق وداق تۋرالى شارتتىڭ ەرەجەلەرىنە تولىق سايكەس جۇرگىزىلەدى.
«رەسەيگە قارسى سانكتسيالارعا بايلانىستى رەسەي فەدەراتسياسىنا كەز كەلگەن تاۋارلاردى ەكسپورتتاۋعا تىيىم سالىنباعان.
بۇل رەتتە ەكسپورتتىق باقىلاۋعا جاتاتىن “قوس ماقساتتاعى" تاۋارلارمەن ساۋدا قازاقستان رەسپۋبليكاسىنىڭ حالىقارالىق مىندەتتەمەلەرىنە سايكەس جۇزەگە اسىرىلاتىنىن اتاپ وتەمىز. زاڭناما بويىنشا مۇنداي تاۋارلارعا قاتىستى ەكسپورت، يمپورت جانە ترانزيت كەزىندە ءتيىستى ليتسەنزيا الۋ قاجەت. ەكسپورتتىق باقىلاۋ جۇيەسى قوس ماقساتتاعى تاۋارلاردى اكەلۋ، اكەتۋ جانە ترانزيتتەۋ ءۇشىن قاجەتتى رۇقسات قۇجاتتارىن الۋدى كوزدەيتىن ساۋدا ساياساتىنىڭ ەرەكشە سالاسى بولىپ تابىلادى. ەكسپورتتىق باقىلاۋ ۇلتتىق قۇزىرەتكە جاتادى، ول ەاەو تۋرالى شارتتا دا بار»،—دەلىنگەن حابارلامادا.
مينيسترلىك قوس ماقساتتاعى تاۋارلاردى ەكسپورتتىق باقىلاۋ حالىقارالىق تارتىپكە ساي 20 جىلدان استام ۋاقىت بويى جۇزەگە اسىرىلىپ كەلە جاتقانىن اتاپ ءوتتى.
ەسكە سالايىق، بۇعان دەيىن بىرقاتار باق قازاقستان اسكەري ماقساتتا پايدالاتىن 106 تاۋاردى رەسەيگە ەكسپورتتامايتىنىن جازعان ەدى.
