بيزنەسمەن قايرات بورانباەۆ استانا، الماتى جانە قوستانايدا 34 ميلليارد تەڭگەگە تاعى بىرقاتار اكتيۆتەردى مەملەكەت مەنشىگىنە وتكىزدى، دەپ حابارلايدى "ادىرنا" پورتالى قارجى مونيتورينگى اگەنتتىگىنىڭ (قبم) ءباسپاسوز قىزمەتىنە سىلتەمە جاساپ.
«قايرات بورانباەۆتىڭ مۇلكىن مەملەكەت كىرىسىنە قايتارۋ شارالارىن افم (قارجىلىق مونيتورينگ اگەنتتىگى) جۇرگىزىپ جاتىر. كەڭسە ءۇي-جايلارى، ساۋدا جانە ويىن-ساۋىق كەشەنى، سونداي-اق دەنە شىنىقتىرۋ-ساۋىقتىرۋ جەلىسى مەملەكەت كىرىسىنە وتەدى. ونىڭ ىشىندە قۇنى 33,75 ملرد تەڭگە بولاتىن نىساندار، اتاپ ايتقاندا، الماتى قالاسىنىڭ التىن الاڭىندا ورنالاسقان «المالى» ساۋدا ورتالىعىنىڭ عيماراتى، سونداي-اق جالعا بەرۋ جانە مۇلىكتى باسقارۋمەن اينالىساتىن «Unity Hall» جشس قايتارىلادى. Almaty Towers بيزنەس ورتالىعىندا ورنالاسقان نىساننىڭ اۋدانى 11 مىڭ شارشى مەتردەن اسادى. سونىمەن قاتار Fitnation فيتنەس-كلۋبتار جەلىسى مەملەكەت مەنشىگىنە ءوتتى. نىساندار استانا، الماتى جانە قوستاناي قالالارىندا ورنالاسقان»، - دەلىنگەن سارسەنبى كۇنى تاراتقان حابارلامادا.
قارجىلىق مونيتورينگ اگەنتتىگىنىڭ مالىمەتىنشە، «بۇل نىسانداردىڭ بارلىعى قولدانىستاعى زاڭناماعا سايكەس دەمالىس، ساۋىقتىرۋ جانە ءبىلىم بەرۋ ورتالىقتارىن ۇيىمداستىرۋ ارقىلى الەۋمەتتىك ماقساتتا پايدالانۋ جوسپارلانۋدا».
«اكتيۆتەردى قايتارۋ بويىنشا جۇمىس جالعاسۋدا»، - دەپ قوستى دەپارتامەنتتە.
ەستەرىڭىزگە سالا كەتەيىك، بورانباەۆ 31 ناۋرىزدا سەگىز جىلعا باس بوستاندىعىنان ايىرىلعان بولاتىن. 14 قىركۇيەكتە قارجى مونيتورينگى اگەنتتىگى بورانباەۆتىڭ مەملەكەتكە 120 ميلليارد تەڭگەنىڭ مۇلكىن قايتارعانىن، ال 15 قىركۇيەكتە كاسىپكەردىڭ باس بوستاندىعىنان ايىرۋ مەرزىمى التى جىلعا دەيىن قىسقارتىلعانىن حابارلادى. 14 قازاندا بورانباەۆقا قاتىسى بار ماڭعىستاۋ وبلىسىنداعى Phystech II اق مۇناي كومپانياسىنىڭ 100% اكتسياسى مەملەكەتكە بەرىلگەنىن حابارلادى. 16 قازاندا بورانباەۆتىڭ قۇنى 1,4 ملرد تەڭگە بولاتىن «Comfort Hotel Astana» قوناقۇيىن مەملەكەت مەنشىگىنە وتكىزگەنى حابارلانسا، 17 قازاندا كاسىپكەردىڭ شەتەلگە اۋدارىلعان 30 ملرد تەڭگەنى ءبىلىم بەرۋ ينفراقۇرىلىمىن قولداۋ قورىنا اۋدارعانى بەلگىلى بولدى.
