ءبىر ايدان اسا ۋاقىت ىشىندە 13 ايماقتى ارالاپ شىققان «شاحمات كەرۋەنى» 17 قازاندا ۇلىتاۋعا كەلىپ ايالدادى. قازاقستان شاحمات فەدەراتسياسىنىڭ وڭىرلەردەگى ينتەللەكتۋالدى سپورت ءتۇرىن دامىتۋ ءۇشىن قولعا العان جوباسىنا Freedom Broker كومپانياسى باس دەمەۋشىلىك جاساپ وتىر، دەپ حابارلايدى «ادىرنا» ۇلتتىق پورتالى.
فەدەراتسيانىڭ ۆيتسە-پرەزيدەنتى الەكساندر بابەنكو ءار وبلىستىڭ ۇزدىكتەرىن انىقتاۋ ءۇشىن جولعا شىققان كەرۋەن ءوز قاتىسۋشىلارىنا جاس بويىنشا ەشقانداي شەكتەۋ قويمايتىنىن ايتتى.
«تۋرنيرىمىزگە ىرىكتەۋدەن وتكەن كەز كەلگەن ويىنشى قاتىسا الادى. ەرەسەكتەر مەن جاسوسپىرىمدەر دەگەن دەڭگەيگە بولمەيمىز. ياعني، جاسى ۇلكەن اقساقال مەن كىشكەنتاي بالا دا ءبىر شاحمات تاقتاسىندا كەزدەسە بەرەدى. شاحمات – قاراپايىم عانا سپورت ءتۇرى ەمەس، ول ۇلتتىڭ زياتكەرلىك دەڭگەيىن كوتەرەتىن ۇلكەن قۇرال. سوڭعى جىلدارى شاحماتشىلارىمىز حالىقارالىق دەڭگەيدە ۇلكەن جەتىستىكتەرگە جەتىپ ءجۇر. دەگەنمەن ءبىز ەلىمىزدىڭ الىس اۋداندارى مەن وڭىرلەرىنە دە كوڭىل بولگىمىز كەلەدى. وسى قوزعالىس جولىندا قوعام مەن بيلىك وكىلدەرىنىڭ اتسالىسقانىن قالايمىز»، – دەدى ۆيتسە-پرەزيدەنت.
مەرەكەلىك شارادا قازاقستان شاحمات فەدەراتسياسىنىڭ وبلىستىق فيليالى اشىلىپ، ونىڭ توراعاسى بوپ وبلىس اكىمىنىڭ ورىنباسارى داستان رىسپەكوۆ تاعايىندالدى.
«سوڭعى شاحمات بايقاۋلارىنا ۇلىتاۋ وڭىرىنەن 100-دەن استام ويىنشى قاتىسىپ ءجۇر. ىشىندە 5-6 جاتتىقتىرۋشى بار. وبلىس رەتىندە ەندى-ەندى دامىپ كەلە جاتقاندىقتان، ءالى دە ارامىزدان جاڭا شاحماتشىلار مەن رەسپۋبليكالىق، حالىقارالىق دەڭگەيدە جارقىرايتىن جۇلدىزدار شىعادى دەپ سەنەمىن»، – دەيدى فەدەراتسيانىڭ ۇلىتاۋ وبلىسى بويىنشا اتقارۋشى ديرەكتورى باعدات بايسالبەكوۆ.
سونداي-اق ول كەرۋەننىڭ كەلۋى ءوڭىر تۇرعىندارىنىڭ شاحماتقا دەگەن قىزىعۋشىلىعىن ارتتىرىپ جاتقانىن ايتادى. شارا كەزىندە بىرنەشە اتا-انا كەلىپ، ءوز بالالارىن شاحمات ۇيىرمەلەرىنە قاتىستىرعىسى كەلەتىندەرىن جەتكىزگەن.
فيليالدىڭ اشىلۋىنان سوڭ 11 كەزەڭنەن تۇراتىن بليتستەن تۋرنير بولىپ، وندا وبلىستىق ىرىكتەۋدەن وتكەن 20 ادام ءوزارا باق سىناستى. ناتيجەسىندە، 8 سىنىپتا وقيتىن 13 جاسار ءسالىمجان ساقباەۆ ءىىى ورىن تۇعىرىنا شىقسا،اۆاريالىق قۇتقارۋ قىزمەتكەرى الماس سارمۇرزاەۆ ءىى ورىنعا جايعاستى. ال تۋرنير كەزەڭدەرىندە ەڭ جوعارى كورسەتكىشكە جەتكەن 10 جاسار ماقسات بايسالبەكوۆ جۇلدەلى ءى ورىن بيىگىنەن كورىندى. ءۇش جەڭىمپاز دا تۇركىستاندا وتەتىن گراند-فينالعا جولداما الدى.
«مەن 5 جاسىمنان بەرى شاحمات وينايمىن. ونى العاش اكەمنەن ۇيرەنگەم. ال قازىر جەكە جاتتىقتىرۋشىممەن ونلاين دايىندالامىن. تۋرنيردە ماعان ءىى ورىن العان الماس مىقتى قارسىلاس بولدى. ەكەۋمىز دە 8 ۇپايدان جينادىق. بىراق كوەففيتسيەنت سانى بويىنشا مەن العا شىقتىم»، – دەيدى ءى ورىن جۇلدەگەرى ماقسات.
سونداي-اق اۋەسقوي شاحماتشىلار اراسىندا وتكەن جارتىلاي فينالدا 15 جاسار ەلەنا جاكسىمۋراتوۆا «ايەلدەر اراسىنداعى ۇزدىك كورسەتكىش»، ۆاديم گۋدوۆششيكوۆ «16 جاسقا دەيىنگى ۇزدىك قاتىسۋشى» جانە دميتري يۆانوۆ «50جاستان اسقان ارداگەر ويىنشى» اتالىمدارى بويىنشا ماراپاتتالىپ، 30 مىڭ تەڭگە اقشالاي سىيلىقتارعا يە بولدى.
ۇلىتاۋ وبلىسى بويىنشا اقپاراتتىق بايلانىس: ايزادا ورازحان +7 702 379 84 92
«ادىرنا» ۇلتتىق پورتالى
