Qazaqstanda kıikterdi atý josparlanýda. Bul týraly Ekologııa jáne tabıǵı resýrstar mınıstri Erlan Nysanbaev kıik sany qalaı retteletinin aıtty, dep habarlaıdy “Adyrna”ulttyq portaly.
Mınıstrdiń aıtýynsha, kıik sanyn basqarý jónindegi bıologııalyq negizdemede popýlıaııany retteýdiń eki tásili usynylǵan. Birinshisi – tor qurý arqyly ustap, etin et óńdeıtin zaýyttarǵa jetkizý. Bul ádis kúndiz jasalady. Ekinshisi – túnde atyp alý.
"Búginde biz tormen ustaý tásilin bastadyq. Biraq sońǵy eki aptada jańbyr kóp jaýyp, bul tásildi júzege asyrý qıyndyq týǵyzdy. Osydan keıin biz bıologııalyq negizdemede kórsetilgen ekinshi tásildi qoldanýǵa sheshim qabyldadyq. Jalpy bıologııalyq negizdeme boıynsha 337 myń bas kıik rettelýi qajet. Qazir tor arqyly 91 bas kıik ustalsa, ekinshi tásilmen bar-joǵy 14 bas kıik atyp alyndy", - dedi Nysanbaev ortalyq kommýnıkaııalar qyzmetinde ótken baspasóz máslıhatynda.
Bıylǵy kóktemgi tóldi sanamaǵanda kıik sany 1 mln 950 myń basqa jetken.
"Jalpy kıik – ósimtal mal. Kelesi kóktemde sanaq ótedi, biraq biz qazir eń tómen boljammen alǵanda, mysaly 30 paıyzdy alǵannyń ózinde taǵy 600 myńnan astam kıik qosylyp otyr. Iaǵnı búgingi kúni kıik sany 2 mln 600 myńnyń ústinde bolady," - deıdi vedomstvo basshysy.
Sondaı-aq, Nysanbaev aqbókenderdiń aýyl sharýashylyǵyna 12 mıllıard teńgeden astam zııan keltirgeni týraly derekterdi keltirdi.
"Biz buryn kıikti nege atqyzbaı keldik? Nege kıik sanyn retteý máselesin qarastyrǵan joqpyz? Sebebi ol ýaqytta kıikterdiń sany óte tómen boldy. Al qazir olardyń sany tarıhı kórsetkishten asyp ketti. Búginde kıikterden dıqanshylarǵa 12 mlrd teńge zalal kelgenin bilesizder. Sol sebepti kıik sanyn retteý qajet. Mysaly, buryn kıikti kim retteıtin? Ony retteıtin qasqyr, jut, aýrý bolatyn. Al qazir tabıǵatta ejelden kele jatqan mundaı retteý tásilderi jumys istemeıdi, - deıdi Nysanbaev.
