«قازاقستاننىڭ حالىق جازۋشىسى» اتاعى قايتا بەرىلەدى، دەپ حابارلايدى «ادىرنا» ۇلتتىق پورتالى
بيىل مەملەكەت باسشىسى قاسىم-جومارت توقاەۆ تۇركىستاندا وتكەن ۇلتتىق قۇرىلتايدا «قازاقستاننىڭ حالىق جازۋشىسى» اتاعىن قايتارۋ تاپسىرماسى اياسىندا اشىق نقا پورتالىندا ۇكىمەت قاۋلىسىنىڭ جوباسى جاريالانعان بولاتىن.
بۇل اتاققا بۇعان دەيىن «قازاقستاننىڭ ەڭبەك سىڭىرگەن قايراتكەرى» جانە ادەبيەت سالاسىنداعى مەملەكەتتىك سىيلىق لاۋرەاتى اتانعاندار ۇمىتكەر بولا الاتىن.
«قازاقستاننىڭ حالىق جازۋشىسى» قۇرمەتتى اتاعى قازاقستان رەسپۋبليكاسىنىڭ ادەبيەتىن دامىتۋعا ەرەكشە ۇلەس قوسقان، بۇرىن «قازاقستاننىڭ ەڭبەك سىڭىرگەن قايراتكەرى» جانە (نەمەسە) ادەبيەت سالاسىنداعى قازاقستان رەسپۋبليكاسى مەملەكەتتىك سىيلىعىنىڭ لاۋرەاتى اتانعان تۇلعالارعا بەرىلەدى»، - دەلىنگەن ۇكىمەت قاۋلىسىنىڭ جوباسىندا.
ۇكىمەت قاۋلىسىنا قوسا بەرىلگەن تۇسىندىرمە جازبادا «قازاقستاننىڭ حالىق جازۋشىسى» قۇرمەتتى اتاعى توبەلگىسىنىڭ سيپاتتاماسى جازىلعان.
توسبەلگى ديامەترى 30 مم دۇرىس شەڭبەر نىسانىنداعى جەزدەن دايىندالىپ، ونىڭ بەتكى جاعىندا كىتاپ پەن قاۋىرسىن بەينەلەنەتىن بولادى. ال جوعارعى بولىگىندە توسبەلگى شەڭبەرى بويىمەن «قازاقستاننىڭ حالىق جازۋشىسى» دەگەن جازۋ ورنالاسادى.
ايتا كەتەيىك، «قازاقستاننىڭ حالىق جازۋشىسى»، «قازاقستاننىڭ حالىق ءارتىسى»، «قازاقستاننىڭ حالىق اقىنى» اتاقتارىن بەرۋ 1994 جىلدان باستاپ توقتاتىلىپ، ولاردىڭ ورنىنا «قازاقستاننىڭ ەڭبەك سىڭىرگەن قايراتكەرى» اتاعى تاعايىندالعان بولاتىن.
«ادىرنا» ۇلتتىق پورتالى
