نازارباەۆ: سايلاۋعا تۇسسەم حالىق بولىپ، تاعى دا مەنى تاڭدايتىن ەدى

1507
Adyrna.kz Telegram
نۇرسۇلتان نازارباەۆتىڭ ويىنشا، بيلىككە كەلەتىن جاڭا ۇرپاق، جاڭا كوماندا ءوز نوۆاتسيالارىن اكەلەدى

قازاقستاننىڭ تۇڭعىش پرەزيدەنتى نۇرسۇلتان نازارباەۆ مەملەكەتتى باسقارۋدىڭ قىر-سىرى تۋرالى ايتتى.

"حالىق پەن ونىڭ كوشباسشىسى ءبىر-ءبىرىن ءتۇسىنىپ، قولداۋ بىلدىرسە، مەملەكەت تابىسقا جەتە الادى. بارلىق باستاما حالىقتىڭ قولداۋىمەن ىسكە اسۋى قاجەت. بۇل – مەنىڭ نەگىزى ۇستانىمىم. وسى ۋاقىتقا دەيىن سولاي جۇمىس ىستەدىك. ساياساتىمىز دۇرىس بولدى دەپ ويلايمىن. مەن ءوزىم بەس سايلاۋعا قاتىستىم. سوندا ماعان 85 پروتسەنتتەن تومەن داۋىس بەرىلگەن جوق. وسىنداي تۇسىنىستىكتىڭ ارقاسىندا ءبىز قازىرگى جەتىستىكتەرگە جەتتىك دەپ ويلايمىن", - دەدى نازارباەۆ پلەنارلىق وتىرىسىندا.

ەلباسىنىڭ ايتۋىنشا، وسى جولى پرەزيدەنتتىك بيلىكتىڭ ءترانزيتى ويداعىداي ءوتتى. ەندى بۇعان دەيىن قولعا الىنعان باستامالاردى جالعاستىرۋ قاجەت.

"الايدا ول كەزدە مەنىڭ مانداتىم اياقتالعان جوق، ءالى دە جۇمىس ىستەۋگە بولاتىن ەدى. سايلاۋعا ءوز كانديداتۋرامدى شىعارعاندا جالپى حالىق بولىپ، تاعى مەنى تاڭدايتىن ەدى. ونى 100 پروتسەنتتىك سەنىممەن ايتۋعا بولادى. دەگەنمەن، بىزگە وزگەرىستەر كەرەك. جاڭا ۇرپاقتىڭ كەلگەنى دۇرىس. مەنىڭشە، بيلىككە كەلەتىن جاڭا ۇرپاق، جاڭا كوماندا ءوز نوۆاتسيالارىن اكەلەدى", - دەپ اتاپ كورسەتتى تۇڭعىش پرەزيدەنت.

ءوز سوزىندە ول وسى ۋاقىتقا دەيىن اتقارىلعان شارالاردى دا اتاپ ءوتتى. سونىڭ ىشىندە ۇلتىق قور، "نۇرلى جول" باعدارلاماسى، يندۋستريالىق-يننوۆاتسيالىق باعدارلاما، يپوتەكالىق جۇيە جانە تاعى باسقا باستامالار بار. نازارباەۆ قازاقستانداعى ەكى مەملەكەتتىك تۇلعا – تۇڭعىش پرەزيدەنت پەن پرەزيدەنتكە قاتىستى ءوز ويىن دا جەتكىزدى.

"بۇگىن ءبىز سپيكەرگە ىڭعايسىزدىق تۋعىزىپ وتىرعان سياقتىمىز (كۇلدى). ول الدىمەن "تۇڭعىش پرەزيدەنت" دەيدى، ودان كەيىن "پرەزيدەنت" دەپ تانىستىرۋ كەرەك. مەنىڭشە، قازاقستاندا ەكىۇدايىلىق بولمايدى. بىزدە ءبىر پرەزيدەنت قانا بار. ول – باستى تۇلعا. ونى سايلاعاننان كەيىن ءبارىمىز سوعان جۇمىس ىستەيتىن بولامىز", - دەدى نازارباەۆ.

 

پىكىرلەر