قوناەۆتا وتكەن «شاحمات كەرۋەنى» تۋرنيرىندە سەگىزىنشى سىنىپ وقۋشىسى جەڭىمپاز اتاندى

7089
Adyrna.kz Telegram

بۇگىن قوناەۆ قالاسىنىڭ ورتالىق الاڭىندا «شاحمات كەرۋەنىنىڭ» كەلۋىنە ارنالعان سالتاناتتى شارا ءوتتى.

Freedom Broker باس سەرىكتەسىنىڭ قولداۋىمەن جۇزەگە اسىپ جاتقان رەسپۋبليكالىق جوبا وڭىرلەردە شاحمات قوزعالىسىن ناسيحاتتاۋدى ماقسات تۇتادى. كەرۋەن يدەياسى ساۋدامەن قاتار، حالىقتاردىڭ مادەني جانە سپورتتىق مۇراسىن الەمگە تاراتقان ۇلى جىبەك جولىنا نەگىزدەلگەن.

«شاحمات – ادامنىڭ اقىل-ويىن ۇشتاپ، جىلدام شەشىم قابىلداۋعا ۇيرەتەتىن ويىن. قازىرگى قوعام ينتەللەكتى جوعارى، تەرەڭ ويلى ازاماتتاردى قاجەت ەتەدى. سوندىقتان بۇگىنگى شاحمات دوداسى ەلىمىزدە وسى سپورت ءتۇرىن دامىتىپ قانا قويماي، جاڭا ەسىمدەردىڭ تانىلۋىنا ۇلەس قوسادى دەگەن سەنىم بار»، – دەدى وبلىس اكىمىنىڭ ءبىرىنشى ورىنباسارى نۇرلان ءابدىراحىم.

كەرۋەننىڭ كەلۋى اياسىندا قازاقستان شاحمات فەدەراتسياسىنىڭ الماتى وبلىستىق فيليالى اشىلدى. ونىڭ توراعاسى G4 City كومپانياسىنىڭ باس ديرەكتورى جانىبەك ساۋىربەك بولدى.

«ەلىمىز الەمدىك شاحماتتىڭ ورتالىعىنا اينالدى. جاقىندا قىتايدا، ازيا ويىندارىندا بولعان كەزىمدە ماعان شەتەلدىك شاحماتشىلار كەلىپ: «قازاقستان تەك ءوز ەلىندە ەمەس، بۇكىل الەمدەگى شاحماتتىڭ دامۋىنا ەڭبەك ءسىڭىرىپ جاتىر» دەگەن پىكىر ايتتى. ءبىزدىڭ مىندەتىمىز – ۇلتتىڭ زياتكەرلىك الەۋەتىن دامىتۋ»، – دەدى قازاقستان شاحمات فەدەراتسياسىنىڭ اتقارۋشى ديرەكتورى گۇلميرا داۋلەتوۆا.

10 قىركۇيەكتە باستالعان كەرۋەن قازىردىڭ وزىندە كوكشەتاۋ، قوستاناي، پەتروپاۆل، سەمەي، تالدىقورعان جانە باسقا دا قالالاردى ارالاپ ۇلگەردى. 10 قاراشاعا دەيىن ول ەلىمىزدىڭ تۇكپىر-تۇكپىرىنە ساپار شەگەدى.

ورتالىق الاڭدا تىگىلگەن ءموبيلدى كيىز ۇيدە گروسسمەيستەرمەن ءبىر مەزەتتىك ويىن سەانسى مەن شاحمات ءتۋرنيرى ءوتتى. تۋرنير ناتيجەسى بويىنشا سەگىزىنشى سىنىپ وقۋشىسى ارسەن ەسەنتاي ءى ورىن جەڭىمپازى اتاندى. جۇلدەلى ءىى ورىندى سارسەنعالي جانقۋاتوۆ ەنشىلەپ، ءىىى ورىن يەگەرى اتاعى تاير ايدىنۇلىنا بۇيىردى.

«ارسەن التى جاسىندا تەلەديداردان شاحمات تۋرالى باعدارلامانى كورىپ، بىزگە سۇراقتار قويا باستادى. ءبىز باسىندا مۇنى جاي بالالىق قالاۋ شىعار دەپ ويلادىق، بىراق ول كەيىن وزىنە باپكەر كەرەگىن ايتتى. قازىر ول گروسسمەيستەر جانە الەم چەمپيونى بولۋدى ارماندايدى»، – دەيدى تۋرنير جەڭىمپازىنىڭ اناسى ءسانيا مۇحامەتقاليەۆا.

ايتا كەتسەك، جارتىلاي فينال جەڭىمپازدارى 100 مىڭ، 50 مىڭ، 30 مىڭ تەڭگە اقشالاي سەرتيفيكاتتارمەن قاتار، تۇركىستاندا وتەتىن گراند-فينالعا جولداما الادى.

 

 

پىكىرلەر