بەلسەندى تيمۋر دانەباەۆ ءوزى ۋاقىتشا قاماۋدا وتىرعان كوكشەتاۋداعى ۋاقىتشا ۇستاۋ يزولياتورىنان استانانىڭ تەرگەۋ يزولياتورىنا اۋىستىرىلدى. بۇل تۋرالى ىشكى ىستەر مينيسترلىگىنىڭ قىلمىستىق-اتقارۋ جۇيەسى كوميتەتى ازاتتىق راديوسىنىڭ ساۋالىنا بەرگەن جاۋابىندا حابارلادى، دەپ جازادى "ادىرنا".
دانەباەۆ 30 قىركۇيەكتە استاناداعى №64 مەكەمەگە تەرگەۋ يزولياتورىنا جەتكىزىلدى.
3 قىركۇيەكتە الەۋمەتتىك جەلىلەردە اقمولا وبلىسىنداعى كولونيا قىزمەتكەرلەرىنىڭ سوتتالعان بەلسەندى تيمۋر دانەباەۆ پەن باسقا دا تۇتقىنداردى ۇرىپ-سوققانى بەينەلەنگەن ۆيدەو تاراي باستادى. تاراتىلىپ جاتقان ۆيدەودا كولونيا قىزمەتكەرلەرى بەلسەندىگە ونىڭ «قارسىلىق كورسەتىپ»، «كۇندەلىكتى ءتارتىپ پەن قاماۋ رەجيمىن ساقتاۋدان» باس تارتىپ وتىرعانىن ايتادى. سونداي-اق ولار دانەباەۆتان جۋىناتىن بولمەنى تازالاۋدى تالاپ ەتەدى، وعان ول تەك ۇيىقتايتىن بولمەنى جۋعا دايىنمىن دەپ جاۋاپ بەرەدى. ۆيدەودا كولونيا قىزمەتكەرى ەكى رەت «ارنايى قۇرالداردى قولدانىڭىز» دەگەن پارمەن بەرىپ، سودان كەيىن دانەباەۆتى ۇرىپ-سوعادى.
قىركۇيەكتىڭ 4-ءى كۇنى قىلمىستىق-اتقارۋ جۇيەسى كوميتەتى «الەۋمەتتىك جەلىدە جاريالانعان ۆيدەوعا» قاتىستى قىزمەتتىك تەكسەرىس جۇرگىزىلىپ جاتقانىن، ويتكەنى «قىزمەتكەرلەردىڭ قىزمەتتىك بابىن اسىرا پايدالانۋ بەلگىلەرى بار» دەپ مالىمدەدى.
قىركۇيەكتىڭ 8-ءى كۇنى قىلمىستىق اتقارۋ جۇيەسى كوميتەتىنىڭ توراعاسى جانات ەشماعامبەتوۆ اتباسارداعى كولونيانىڭ تۇتقىنداردى ۇرىپ-سوعۋعا قاتىسى بار توعىز قىزمەتكەرى جۇمىستان بوساتىلعانىن، ال تاعى ەكەۋى ەڭبەك دەمالىسىنان كەلگەن سوڭ جۇمىستان شىعارىلاتىنىن حابارلادى. كولونيا باستىعى مەن ونىڭ ورىنباسارى، وبلىستىق قاج دەپارتامەنتى باستىعىنىڭ ورىنباسارى دا قىزمەتتەرىنەن بوساتىلدى. وبلىستىق قىلمىستىق-اتقارۋ جۇيەسىنىڭ باسشىسىن دا جۇمىسىنان شىعارۋ ۇسىنىلدى.
ماۋسىم ايىندا استانانىڭ الماتى اۋداندىق No2 سوتى تيمۋر دانەباەۆتى ۇلتارالىق ارازدىقتى قوزدىرۋ بابى بويىنشا ءۇش جىلعا باس بوستاندىعىنان ايىردى.
بەلسەندى تيمۋر دانەباەۆ پرەزيدەنت قاسىم-جومارت توقاەۆتى 2022 جىلعى قاڭتار وقيعاسى كەزىندەگى «20 مىڭ لاڭكەس» تۋرالى مالىمدەمەسى ءۇشىن جاۋاپقا تارتۋدى تالاپ ەتكەنىمەن تانىمال بولدى.
