بيىل 02 مامىردا الماتى قالاسىنىڭ تەرەكتى ىقشاماۋدانى تۇرعىندارى تاپا-تال تۇستە جانتۇرشىكتىرەرلىك وقيعانىڭ كۋاسى بولدى. ساۋلە مەكتەپكە ەكى بالاسىن جەتەكتەپ كەلە جاتتى. قايشا 2-سىنىپتا وقيدى. ال مەيىربان ءالى مەكتەپكە بارماعان. انا مەن ەكى ءبۇلدىرشىننىڭ ويىندا ەشتەڭە جوق ەدى. جايماشۋاق كوكتەمنىڭ كۇنى الداعى جازعى دەمالىستىڭ كوپتەگەن قۋانىشتى كۇندەرىنە ۋادە بەرىپ جاتقانداي بولاتىن. جاياۋ ادام جۇرەتىن جولاقتىڭ ۇستىندە شىققاندا 6 جاسار مەيىربان العا وزىپ كەتىپتى. سول-سول-اق ەكەن، قارسى جولاقتان شىعا كەلگەن «لەكسۋس» كولىگى جىلدامدىعىن دا تەجەمەستەن، ءتىپتى، تەجەگىشتى دە باسپاستان، قۇيعىتىپ كەلىپ، مەيىرباندى اناسىنىڭ كوز الدىندا جۇلىپ اكەتتى. سوققىنىڭ قاتتى بولعانى سونشالىقتى، بەيكۇنا ءسابي 15-20 مەتر جەرگە دەيىن ۇشىپ كەتتى. ساۋلەنىڭ شىرقىراعان جان داۋىسى تىپ-تىنىش كوشەنى باسىنا كوتەردى. بىراق ءبارى كەش ەدى. پەرىشتەنىڭ جانى كولىك مىجعىلاپ تاستاعان كەۋدەسىن تاستاپ و دۇنيەگە كەتە باردى. الگىندە عانا كەۋدەنى كەرنەگەن ءتاتتى قيال ورنى تولماس وكسىككە ۇلاستى...
سوت-مەديتسينالىق ساراپتاما قورىتىندىسى مەيىرباننىڭ باس سۇيەگىنىڭ سىنىپ، ميعا قان قۇيىلعانىن، اياعى مەن جامباسىنىڭ كۇل بولىپ كەتكەنىن انىقتادى. بىراق پوليتسيا تاراپىنان وسى وقيعا بويىنشا قىلمىستىق ءىس قوزعاۋ، كولىك رولىندە وتىرعان مەرۋەرت سىبانقۇلوۆانى سۇراق-جاۋاپقا الۋ، سوتقا دەيىن قاماۋعا الۋ ماسەلەسى سوزبۇيداعا سالىنىپ، سيىرقۇيىمشاقتانىپ بارادى. ايىپكەردىڭ تۋىستارى قارالى ۇيدەن كەشىرىم سۇراۋدىڭ ورنىنا «قىزىمىزدىڭ بولاشاعىنا بالتا شاپقىزىپ قويمايمىز! قولدارىڭنان كەلگەندى ىستەپ الىڭدار!» دەپ ايقايلاپ، ءدوڭايبات كورسەتىپ كەتىپتى. قىلمىستىق ءىستىڭ سۇيىلىپ كەتۋىن جانە كىنالى تاراپتىڭ تىزەگە سالۋ سەبەبىن انىقتاماق بولىپ، زەرتتەۋ جاساعانىمىزدا مىنانداي جايتقا كەزىكتىك.
ايىپكەر مەرۋەرت سىبانقۇلوۆانىڭ اكەسى تالعات سىبانقۇلوۆ الماتى قالالىق كىرىس دەپارتامەنتى ۇيىمداستىرۋ ءبولىمىنىڭ ۇيىمداستىرۋ-قارجى باسقارماسىنىڭ باس مامانى بولىپ قىزمەت اتقارادى. وسى فاميليالاس ەرنات سىبانقۇلوۆ بولسا، كەزىندە الماتىنىڭ المالى جانە مەدەۋ اۋداندارىندا، جامبىل وبلىسىندا، اتىراۋ وبلىسىندا پروكۋرور بولىپ قىزمەت اتقارعان. جاقىندا عانا رەسپۋبليكانىڭ باس كولىك پروكۋرورى بولىپ تاعايىندالدى. ىستىڭ وسىنداي سوزباققا سالىنۋىنا، ايىپكەر تۋىستارىنىڭ كۇشەنىپ، سوزبەن كۇش كورسەتۋىنە وسى جاعداي دەم بەرىپ وتىرعان سىڭايلى. بىلەتىندەردىڭ ايتۋىنشا، مەرۋەرتتىڭ اكەسى تالعات پەن ەرنات سىبانقۇلوۆتار نەمەرەلەس اعايىندى كورىنەدى. ياعني، تالعات پەن ەرناتتىڭ اكەلەرى تۋعان اعايىندى. وتكەن جىلى قىزىلوردا وبلىسىندا وسىعان ۇقساس ەكى وقيعا تىركەلگەن ەدى. ونىڭ بىرىندە اكەسىنىڭ كولىگىن ايدان شىققان 14 جاستاعى بوزبالا زەبرانىڭ ۇستىندە بويجەتكەن قىزدى قاعىپ ءولتىردى. بىراق «كامەلەت جاسىنا جەتپەگەندىكتەن» دەگەن سەبەپپەن، ءجاسوسپىرىم قىلمىستىق جازادان سىتىلىپ كەتتى. ول كەزدە دە «تىرەگى مىقتى» ايىپكەر جاق مارقۇمداردىڭ ۇيىنە بارىپ، قورقىتىپ-ۇركىتىپ ەدى. ونىڭ الدىندا ارال اۋدانىندا اقنۇر تۇكەشوۆا ەسىمدى بويجەتكەندى ارال اۋداندىق مادەنيەت ءۇيىنىڭ ديرەكتورى كولىكپەن قاعىپ كەتىپ، قىلمىستىق جاۋاپكەرشىلىكتەن ول دا قۇتىلىپ كەتتى. ريددەر قالاسى اكىمىنىڭ ورىنباسارى باۋىرجان قۇرمانباەۆ تا ماس كۇيىندە كولىك ايداپ، سمولنيكوۆ دەگەن ازاماتتى سوعىپ ءولتىردى. بۇل ءىس تە ءسال بولماعاندا جابىلىپ قالۋى مۇمكىن ەدى. قوعامدىق پىكىردىڭ قىسىمىمەن قۇرمانباەۆ 1 عانا جىلعا سوتتالىپ، 5 جىل بويىنا كولىك قۇرالىن ايداۋ قۇقىعىنان ايىرىلدى.
سوندا، ەلىمىزدىڭ زاڭدارى كىمگە قىزمەت ەتەدى؟ ال باستىقتار مەن ولاردىڭ تۋىستارىنا قانشا ادام ولتىرۋگە قۇقىق بەرىلگەن؟ كۇدىكتى مەرۋەرت سىبانقۇلوۆا نە سەبەپتى ءالى بوستاندىقتا ءجۇر؟ سوتقا دەيىنگى بۇلتارتپاۋ شارالارى نە سەبەپتى قولدانىلماي وتىر؟ مەيىرباننىڭ مەزگىلسىز اجالىنا بايلانىستى الماتى قالالىق ىشكى ىستەر دەپارتامەنتى بۇل سۇراققا قانداي جاۋاپ بەرەدى ەكەن؟ الدە، قالىڭ قالتادان توگىلگەن اقشا كىسى ءولىمىن دە جاۋىپ جىبەرمەك پە؟
توقتار جاقاش، جۋرناليست
