قاراعاندى وبلىسىندا تۇرمىستىق تەحنيكا شىعاراتىن ءوندىرىستى ىسكە قوسۋ جوسپارلانىپ وتىر. بۇل تۋرالى ونەركاسىپ جانە قۇرىلىس ءمينيسترى قانات شارلاپاەۆ ايتتى، دەپ حابارلايدى «ادىرنا» ۇلتتىق پورتالى Halyq Uni سايتىنا سىلتەمە جاساپ.
مينيستر وڭدەۋ ونەركاسىبىن دامىتۋ تۋرالى پرەمەر-مينيسترگە ەسەپ بەردى.
«2022 جىلدىڭ قورىتىندىسى بويىنشا وڭدەۋ ونەركاسىبى قازاقستاننىڭ جالپى ىشكى ونىمىندە 13,4% بولىپ، ساۋدا مەن تاۋ-كەن ونەركاسىبىنەن كەيىنگى ءۇشىنشى كورسەتكىشكە قول جەتكىزدى. سالا وندىرىسىندە وڭ ديناميكا بايقالادى. بىلتىر وندىرىلگەن ءونىمنىڭ كولەمى – 21,1 ترلن تەڭگە. بۇل بەس جىل بۇرىنعى كورسەتكىشتەن 2,2 ەسە ارتىق. سالادا 613 مىڭننا اسا تۇراقتى جۇمىس ورنىن قامتاماسىز ەتەتىن 20 مىڭعا جۋىق كاسىپورىن جۇمىس ىستەيدى»، - دەدى مينيستر.
وڭدەۋ ونەركاسىبى كاسىپورىندارى بيۋدجەتكە 2,7 ترلن تەڭگە سالىق تولەگەن.
ءمينيستردىڭ ايتۋىنشا، بيىل 12,3 مىڭنان اسا تۇراقتى جۇمىس ورنىن اشىپ، 1 ترلن تەڭگەگە 170 جوبانى ىسكە اسىرۋ جوسپارلانىپ وتىر.
«قاراعاندى وبلىسىندا ونىمدىلىگى جىلىنا 1,1 ملن-نان اسا تۇرمىستىق تەحنيكا شىعاراتىن ءوندىرىستى («Silk Road Electronics» جشس) ىسكە قوسۋ جوسپاردا بار. زاۋىتتا ARTEL برەندىمەن تەلەديدارلار، سۋ جىلىتقىشتارى، شاڭسورعىشتار، شاعىن پەشتەر، كىر جۋعىش ماشينالار جاسالادى، 530 جاڭا جۇمىس ورنى قۇرىلادى. سونداي-اق 261 جاڭا جۇمىس ورنىن قۇرىپ، ارنايى كوكس شىعاراتىن زاماناۋي زاۋىت ىسكە قوسىلادى. قۋاتتىلىعى جىلىنا 400 مىڭ توننا. ءونىم كەيىننەن ەكسپورتقا شىعارىلىپ، ERG كاسىپورىندارىنىڭ ىشكى قاجەتتىلىكتەرىن قامتاماسىز ەتەدى»، - دەدى قانات شارلاپاەۆ.
ونەركاسىپ جانە قۇرىلىس ءمينيسترى قوستاناي وبلىسىندا «سارىارقااۆتوپروم» كومپانياسى Chevrolet وnix اۆتوموبيلدەرىن شاعىن توراپتىق ادىسپەن (CKD) ءوندىرۋدى جوسپارلاپ وتىرعانىن جەتكىزدى.
«جىلىنا 30 مىڭ بىرلىك شىعارۋ جوسپارلانىپ وتىر. بۇل ىشكى سۇرانىستى قامتاماسىز ەتۋگە جانە 400 جۇمىس ورنىن قۇرۋعا مۇمكىندىك بەرەدى»، - دەدى ۆەدومستۆو باسشىسى.
