Qaraǵandy oblysynda turmystyq tehnıka shyǵaratyn óndiristi iske qosý josparlanyp otyr. Bul týraly ónerkásip jáne qurylys mınıstri Qanat Sharlapaev aıtty, dep habarlaıdy «Adyrna» ulttyq portaly Halyq Uni saıtyna silteme jasap.
Mınıstr óńdeý ónerkásibin damytý týraly premer-mınıstrge esep berdi.
«2022 jyldyń qorytyndysy boıynsha óńdeý ónerkásibi Qazaqstannyń jalpy ishki óniminde 13,4% bolyp, saýda men taý-ken ónerkásibinen keıingi úshinshi kórsetkishke qol jetkizdi. Sala óndirisinde oń dınamıka baıqalady. Byltyr óndirilgen ónimniń kólemi – 21,1 trln teńge. Bul bes jyl burynǵy kórsetkishten 2,2 ese artyq. Salada 613 myńnna asa turaqty jumys ornyn qamtamasyz etetin 20 myńǵa jýyq kásiporyn jumys isteıdi», - dedi mınıstr.
Óńdeý ónerkásibi kásiporyndary bıýdjetke 2,7 trln teńge salyq tólegen.
Mınıstrdiń aıtýynsha, bıyl 12,3 myńnan asa turaqty jumys ornyn ashyp, 1 trln teńgege 170 jobany iske asyrý josparlanyp otyr.
«Qaraǵandy oblysynda ónimdiligi jylyna 1,1 mln-nan asa turmystyq tehnıka shyǵaratyn óndiristi («Silk Road Electronics» JShS) iske qosý josparda bar. Zaýytta ARTEL brendimen teledıdarlar, sý jylytqyshtary, shańsorǵyshtar, shaǵyn peshter, kir jýǵysh mashınalar jasalady, 530 jańa jumys orny qurylady. Sondaı-aq 261 jańa jumys ornyn quryp, arnaıy koks shyǵaratyn zamanaýı zaýyt iske qosylady. Qýattylyǵy jylyna 400 myń tonna. Ónim keıinnen eksportqa shyǵarylyp, ERG kásiporyndarynyń ishki qajettilikterin qamtamasyz etedi», - dedi Qanat Sharlapaev.
Ónerkásip jáne qurylys mınıstri Qostanaı oblysynda «SaryarqaAvtoProm» kompanııasy Chevrolet Onix avtomobılderin shaǵyn toraptyq ádispen (CKD) óndirýdi josparlap otyrǵanyn jetkizdi.
«Jylyna 30 myń birlik shyǵarý josparlanyp otyr. bul ishki suranysty qamtamasyz etýge jáne 400 jumys ornyn qurýǵa múmkindik beredi», - dedi vedomstvo basshysy.
