ولار توقاەۆتىڭ دا، قوسانوۆتىڭ دا كىم ەكەنىن بىلمەيدى

1941
Adyrna.kz Telegram

..ءوز جاسىنان الدەقايدا ۇلكەن كورىنەدى. تۇرمىستىڭ قيىندىعى ەڭسەسىن باسىپ تاستاعان. قاشان كورسەم ايتاتىنى: «وسى زەينەتاقىما ۇستىمە ءبىر كويلەك الايىنشى دەيمىن. قۋ دۇنيە جەتپەيدى. بۇگىن زەينەتاقىم ءتۇسىپ قالعان شىعار دەپ ەدىم، تۇسپەپتى. قىزىم «شەشەم كەشىكتى عوي» دەپ جولىما قاراپ وتىرعان شىعار. وعان ءار زەينەتاقى العان سايىن ۇن، كارتوشكا، پياز، كۇرىش، ۆەرميشەل، بارلىق ازىق-تۇلىگىن اپەرەم. ەت قىمبات قوي، سوندىقتان ىشەك-قارىن، بۇيرەك ساتىپ اپەرەم. قوي سويساق، ەت بەرەم. كۇيەۋى جۇمىس ىستەمەيدى. سۇمىرەيگەن بىرەۋ. قىزىم دا جۇمىسسىز» دەدى. وكىنىشتىسى، ايەلدىڭ وسى ومىرىنە كوندىگىپ كەتكەنى ەدى. تۋرا وسىلاي بولۋ كەرەك سەكىلدى زەينەتاقى العان سايىن قىزىنا ازىق-تۇلىك تاسيدى. «ەرتەڭ ءسىزدىڭ كوزىڭىز كەتسە، قىزىڭىز قالاي ءومىر سۇرەدى؟ جارايدى، كۇيەۋى بولماسا دا، ءوزى جۇمىس ىستەۋى كەرەك قوي» دەدىم. «ەندى قايتەم؟ اشتان ءولسىن بە؟ مەكتەپكە ەدەن جۋشى ەتىپ تۇرعىزايىن دەسەم جۇمىسقا تۇرعىزۋ قيىن ەكەن. ەندى اشتان ولتىرەم بە، كۇيەۋىمەن قوسىپ، بالاسى ۇشەۋىن باعىپ جاتىرمىن. ءوزىڭ بىلەسىڭ، قىزىم دا تىم بوس قوي. كۇزدە ماقتا تەرىپ، ايتەۋىر ازىق-تۇلىگىن ءوزى تابادى» دەدى. «ءوزىڭ بىلەسىڭ، بالالارىمنىڭ دا تۇراقتى جۇمىسى جوق قوي. ەشقايسىسى وقىماعان. كەلىندەر دە جۇمىسسىز. ءبارى مەنىڭ زەينەتاقىما قاراپ وتىر. ايتەۋىر كوكتەم شىققاندا بالالار اركىمگە جالدانىپ، جۇمىس ىستەيدى. قازىر كاپۋستا مەن قيار تەرىپ، كۇنىنە ەكى مىڭ تەڭگە الىپ كەلەدى. ايتەۋىر كۇن كورىپ جاتىرمىز. ءتىپتى وزىمە ىشكيىم دە المايمىن» دەپ مۇڭ شاقتى ايەل. كىمدى كىنالايسىڭ؟ وقۋعا ىنتاسى بولماعان بالالارىن با، الدە ولارعا باعىت-باعدار كورسەتپەگەن اكە-شەشەسىن بە؟ اكە-شەشەسىنىڭ زەينەتاقىسىمەن كۇن كورىپ وتىرعان مۇنداي وتباسى ءبىزدىڭ ەلدە از ەمەس قوي. بۇل وتباسىندا ون بەس جان بار. ەشقايسىسى فەيسبۋك دەگەننىڭ نە ەكەنىن بىلمەيدى. الەۋمەتتىك جەلىدەگى ادامداردىڭ «توقاەۆ»، «قوسانوۆ» دەپ ايقايلاپ جاتقانىن دا بىلمەيدى. ولار توقاەۆتىڭ دا، قوسانوۆتىڭ دا كىم ەكەنىن بىلمەيدى. ولارعا كىم پرەزيدەنت بولادى، ءبارىبىر. ولار كىم پرەزيدەنت بولسا دا، ءارى قاراي ءدال وسىلاي ءومىر سۇرە بەرەدى. سەبەبى، ولار وسى ومىرلەرىنە كوندىككەن جاندار... ولار ەڭ ءبىرىنشى ءبىر-ءبىرىنىڭ قۇربانى. بىزگە ەكونوميكانى، حالىقتىڭ الەۋمەتتىك تۇرمىسىن جاقسارتاتىن عانا ەمەس، حالىقتىڭ ساناسىن سىلكىلەيتىن، حالىقتىڭ رۋحاني دەڭگەيىن كوتەرەتىن پرەزيدەنت كەرەك.

اياگۇل مانتاي

پىكىرلەر