..Óz jasynan áldeqaıda úlken kórinedi. Turmystyń qıyndyǵy eńsesin basyp tastaǵan. Qashan kórsem aıtatyny: «Osy zeınetaqyma ústime bir kóılek alaıynshy deımin. Qý dúnıe jetpeıdi. Búgin zeınetaqym túsip qalǵan shyǵar dep edim, túspepti. Qyzym «sheshem keshikti ǵoı» dep jolyma qarap otyrǵan shyǵar. Oǵan ár zeınetaqy alǵan saıyn un, kartoshka, pııaz, kúrish, vermıshel, barlyq azyq-túligin áperem. Et qymbat qoı, sondyqtan ishek-qaryn, búırek satyp áperem. Qoı soısaq, et berem. Kúıeýi jumys istemeıdi. Súmireıgen bireý. Qyzym da jumyssyz» dedi. Ókinishtisi, áıeldiń osy ómirine kóndigip ketkeni edi. Týra osylaı bolý kerek sekildi zeınetaqy alǵan saıyn qyzyna azyq-túlik tasıdy. «Erteń sizdiń kózińiz ketse, qyzyńyz qalaı ómir súredi? Jaraıdy, kúıeýi bolmasa da, ózi jumys isteýi kerek qoı» dedim. «Endi qaıtem? Ashtan ólsin be? Mektepke eden jýýshy etip turǵyzaıyn desem jumysqa turǵyzý qıyn eken. Endi ashtan óltirem be, kúıeýimen qosyp, balasy úsheýin baǵyp jatyrmyn. Óziń bilesiń, qyzym da tym bos qoı. Kúzde maqta terip, áıteýir azyq-túligin ózi tabady» dedi. «Óziń bilesiń, balalarymnyń da turaqty jumysy joq qoı. Eshqaısysy oqymaǵan. Kelinder de jumyssyz. Bári meniń zeınetaqyma qarap otyr. Áıteýir kóktem shyqqanda balalar árkimge jaldanyp, jumys isteıdi. Qazir kapýsta men qııar terip, kúnine eki myń teńge alyp keledi. Áıteýir kún kórip jatyrmyz. Tipti ózime ishkıim de almaımyn» dep muń shaqty áıel. Kimdi kinálaısyń? Oqýǵa yntasy bolmaǵan balalaryn ba, álde olarǵa baǵyt-baǵdar kórsetpegen áke-sheshesin be? Áke-sheshesiniń zeınetaqysymen kún kórip otyrǵan mundaı otbasy bizdiń elde az emes qoı. Bul otbasynda on bes jan bar. Eshqaısysy feısbýk degenniń ne ekenin bilmeıdi. Áleýmettik jelidegi adamdardyń «Toqaev», «Qosanov» dep aıqaılap jatqanyn da bilmeıdi. Olar Toqaevtyń da, Qosanovtyń da kim ekenin bilmeıdi. Olarǵa kim prezıdent bolady, báribir. Olar kim prezıdent bolsa da, ári qaraı dál osylaı ómir súre beredi. Sebebi, olar osy ómirlerine kóndikken jandar... Olar eń birinshi bir-biriniń qurbany. Bizge ekonomıkany, halyqtyń áleýmettik turmysyn jaqsartatyn ǵana emes, halyqtyń sanasyn silkileıtin, halyqtyń rýhanı deńgeıin kóteretin prezıdent kerek.
Aıagúl Mantaı
