باسىنان باستايىق. بيىلعى ناۋرىز مەيرامى، قازاقتىڭ جاڭا جىلى شىنىندا دا ءدال وسىلاي جاڭاشا باستالادى دەپ ەشكىم دە ويلاعان جوق. ەلباسىنىڭ بۇل ساياسي ءجۇرىسىن شەتەلدەر دە قازاقستاندىقتار دا كۇتكەن جوق ەدى. كوپشىلىككە، باسقا دا ەلدەرگە بۇل كەنەتتەن بولعانداي كورىندى. ءتىپتى اقپارات قۇرالدارى «بۇعان دەيىن ەلدى وتىز جىلعا جۋىق باسقارىپ كەلگەن ن.نازارباەۆ بيىل ناۋرىزدىڭ 19-ى كۇنى كەنەتتەن مالىمدەمە جاساپ...» دەپ جازىپ جاتتى.
ەلباسى بۇنداي مالىمدەمەنى كەنەتتەن جاسادى دەگەن كىمدە كىم بولسا دا قاتتى قاتەلەسەدى. بۇلاي دەپ ويلاعاندار ن.نازارباەۆتىڭ قانداي ساياساتكەر ەكەنىن ءتىپتى دە بىلمەيدى دەگەن ءسوز. ەلباسى ن.نازارباەۆ ق.توقاەۆقا تىزگىندى بەرۋى ءبىر كۇننىڭ ناتيجەسى ەمەسى انىق، ۇزاق ۋاقىتتىق ەكەۋارا دايىندىقتىڭ ناتيجەسى.
ەلباسى نەگە قاسىمجومارت توقاەۆتى تاڭدادى؟ دەمەك ن.نازارباەۆ ق.توقاەۆتى ۋاقىتشا ەمەس، ناعىز زاڭدى پرەزيدەنت رەتىندە تاڭداعان. جانە دە ق.توقاەۆتىڭ كەزەكتى پرەزيدەنتتىك سايلاۋدى كۇتپەي كەزەكتەن تىس سايلاۋدى جاريالاۋى دا الدىن الا ويلاستىرىلۋى ابدەن مۇمكىن.
تۋراسىن ايتۋ كەرەك. بۇل پرەزيدەنتتىك سايلاۋ ۇمىتكەرلەرگە سىيلىق بولدى. ەلباسى قاسىمجومارت توقاەۆقا پرەزيدەنت بولعان ساتتە قازىرگى ۇمىتكەرلەرىڭ بىردە-ءبىرى بۇلاي بولادى دەپ ويلاماعانى انىق. سەبەبى ەلدى بيلەگىسى كەلەتىن ادام الىستان ويلاپ ءوز ارەكەتىن جاسايدى. قازىرگى ۇمىتكەرلەردىڭ ەشقايسىسى ويلاماعان جاعداي.
قالاي بولعاندا دا بۇل سايلاۋدىڭ جاريالانۋى پرەزيدەنتتىكتەن ۇمىتكەرلەرگە توسىنسىي بولدى. ولار بۇل سايلاۋعا دايىن ەمەس ەكەنى بىردەن كورىندى. سەبەبى ناعىز ساياساتكەر بۇنداي جاعدايدىڭ بولۋىن الدىن الا بولجاپ دايىندىق جۇرگىزەر ەدى.
بۇندايدى بولجاۋ مۇمكىن ەمەس دەر كەيبىرەۋلەر. بىراق ناعىز ساياساتكەر بولاشاقتا ەل باسقارۋدان ءۇمىتى بولسا شاحماتتاعىداي بىرنەشە قادام العا ويلاۋى كەرەك ەمەس پە؟
بىراق ونداي بولاماعانىن مەن ۇمىتكەرلەردىڭ كىمدەر ەكەنىن بىلگەندە ءتۇسىندىم. مەن ساياساتتان وتە الىس جانمىن. دەگەنمەن «سەن ساياساتپەن اينالىسپاساڭ، ساياسات سەنىمەن اينالىسادى» دەگەن ءسوز بار ەكەنىن باياعىدان بىلەتىنمىن. سوندىقتان ەلدە جانە الەمدە نە بولىپ جاتقانىنان ءاردايىم حاباردار بولىپ جۇرەمىن.
سونىمەن پرەزيدەنتتىك سايلاۋعا قاتىسقىسى كەلەتىندەر تۋرالى بۇقارالىق اقپارات قۇرالدارىنان قاراپ وتىرسام ۇمىتكەرلەردىڭ ءبىرى دە بۇكىل قازاقستانعا كەڭىنەن تانىمال دەۋگە كەلمەيدى ەكەن. ارينە، اتى اتالىپ جۇرگەندەر بار. بىراق ولار دا ساياساتتىڭ، ەل باسقارۋدىڭ نە ەكەنىن جەتە بىلەدى دەۋ قيىن.
سونىمەن ۇيقىسىنان جاڭا ويانعاندار نە ىستەي الۋشى ەدى؟ اپىل-عۇپىل بىردەمەلەر ىستەۋگە تىرىسار. بىراق اسىعىس تىرلىكتىڭ ناتيجەسى «شاۋگىم قاشان قاينار ەكەن» دەپ قاقپاقتى اشا بەرگەن كۇيەۋگە تيگىسى كەلەتىن قىزدىڭ تىرلىگىندەي عوي.
بەردالى وسپان.
