الماتىداعى «شاڭىراق» الەۋمەتتىك ۇيىندەگى قارتتاردىڭ ەڭ ۇلكەنىنىڭ جاسى 100-ءدى شامالادى. بۇل جەردە ءدال قازىر 288 قاريا بار.
مەكەمە ماماندارىنىڭ سوزىنشە، مۇنداعى قارتتار جىل سايىن ارتىپ كەلەدى. "شاڭىراق" ارناۋلى الەۋمەتتىك قىزمەت كورسەتۋ ورتالىعى ديرەكتورىنىڭ الەۋمەتتىك ىستەر جونىندەگى ورىنباسارى سىمبات نابيەۆا وسىناۋ كوڭىل تولقىتار ءۇيدىڭ تۇرعىندارى تۋرالى ايتىپ بەردى.
- بوس ۋاقىتتارىندا قارتتارىمىز ءتۇرلى ۇيىرمەلەر، قولونەر، كىتاپحاناعا بارادى. سونداي-اق، ءبىزدىڭ قارتتار مۋزىكالىق جەتەكشى، ءان ۇيىرمەلەرىمەن دە اينالىسادى،-دەدى "شاڭىراق" ارناۋلى الەۋمەتتىك قىزمەت كورسەتۋ ورتالىعى " كمم-ءنىڭ الەۋمەتتىك ىستەر جونىندەگى ورىنباسارى سىمبات نابيەۆا.
- وسى 288 قاريانىڭ ىشىندە بالالارى، تولىق وتباسى بار قارتتار بار ما؟
- كوبىسىنىڭ بالالارى شەت ەلدەردە تۇرادى. جۇمىس بارىسىمەن ۋاقىتشا كەتكەندەرى دە بار.
- وسى قارتتاردىڭ جاعدايى قالاي؟ ولاردىڭ پوتەنتسيالىن قوعام پايدالانا الىپ وتىر ما؟ مەملەكەت تاراپىنان قارتتارىمىزعا قانداي كومەكتەر كورسەتىلىپ جاتىر؟
- مەملەكەت تاراپىنان قارتتارىمىزگا تولىقتاي كومەك كورسەتىلىپ وتىر. تۇرۋعا ىڭعايلى باسپانا، بارلىق جاعداي جاسالعان، توسەك ورىندارى، مەملەكەتتەن بەرىلەتىن ءدارى-دارمەك، مۇمكىندىگى شەكتەۋلى قارتتارعا ساناتورياعا ارنايى ەمدىك دەمالىس تا مەمەلەكەت تاراپىنان ۇيىمداستىرىلىپ جاتىر.
- وسى 288 قاريانىڭ ىشىندە جاسى ۇلكەنى كىم؟
- اننا سوكولوۆا ەسىمدى 100 جاستاعى قاريامىز بار. جاعدايى جاقسى.
- ول كىسىنىڭ كۇتىمى قالاي؟
- دەنساۋلىق جاعدايى قاناعاتتانارلىق، ءوزىن-ءوزى قامتاماسىز ەتەدى، جاقسى ەستە ساقتاۋ قابىلەتىنە يە،-دەدى قىزمەتكەر.
سىمبات نابيەۆانىڭ ايتۋىنشا، اننا انتونوۆنا ەكىنشى دۇنيەجۇزىلىك سوعىس باستالعاندا 17 جاسىندا وتباسىمەن بىرگە جامبىل وبلىسىنا كوشىرىلگەن ەكەن. سوعىس جىل ارىندا ەڭبەك مايدانىنىڭ بەلسەندى قاتىسۋشىسى بولدى. ول بۋحگالتەر قىزمەتىنەن زەينەتكە شىققان. بۇگىندە مەكەمە تۇرعىنى جاس كەزىندە ەرەن ەڭبەگى ءۇشىن بىرنەشە رەت ۇكىمەتتىك ناگرادالارمەن ماراپاتتالعان.
مامانداردىڭ سوزىنشە، قازىر قاريانىڭ جاعدايى تۇراقتى، مەديتسينالىق تەكسەرىستەن ءجيى ءوتىپ تۇرادى. اننا انتونوۆناعا بەكىتىلگەن ستاندارتقا سايكەس قىزمەتتەردىڭ بارلىق ءتۇرى كورسەتىلەدى.
”ادىرنا” ۇلتتىق پورتالى
