ءازىربايجان اسكەرى رۋبەن ۆاردانياندى تاۋلى قاراباقتان ارمەنياعا كەتپەك بولعان ساتىندە قولعا ءتۇسىردى. ميللياردەر ۆاردانيان تاۋلى قاراباق «ۇكىمەتىن» اقپان ايىنىڭ سوڭىنا دەيىن باسقاردى، دەپ حابارلايدى "ادىرنا".
سارسەنبى، 27 قىركۇيەكتە ءازىربايجان شەكارا قىزمەتى ۇستالعان بۇرىنعى «پرەمەر-ءمينيستردىڭ» سۋرەتىن جاريالادى. ۆەدومستۆونىڭ مالىمەتىنشە، ۆاردانيان باكۋگە جەتكىزىلىپ، «ءتيىستى شەشىم قابىلداۋ ءۇشىن ءازىربايجاننىڭ مەملەكەتتىك ورگاندارىنا» تاپسىرىلعان.
بۇعان دەيىن ۆاردانياننىڭ ۇستالعانى تۋرالى ونىڭ ايەلى ۆەرونيكا زونابەند حابارلاعان. «بۇگىن تاڭەرتەڭ مەنىڭ كۇيەۋىم، مەتسەنات، كاسىپكەر جانە ارتساح رەسپۋبليكاسىنىڭ (تاۋلى قاراباق رەسپۋبليكاسى - رەد.) بۇرىنعى پرەمەر-ءمينيسترى رۋبەن ۆاردانيان مىڭداعان باسقا ادامدارمەن بىرگە ارتساحتى تاستاپ كەتپەك بولعان كەزدە شەكارادا ازەربايجان بيلىگى تۇتقىنداپ، قولعا ءتۇسىردى»، - دەدى ول. زونابەند ۆاردانياننىڭ ارمەنيامەن شەكارادا ءازىربايجان باقىلاۋ-وتكىزۋ پۋنكتى ورنالاسقان اكاري كوپىرىنەن ءوتىپ بارا جاتقاندا ۇستالعانىن ءتۇسىندىردى.
