12 قىركۇيەك كۇنى ادىرنا ۇلتتىق پورتالىندا «اقتوبە وبلىسىنىڭ پوليتسيا دەپارتامەنتى 2 ملن 544 مىڭ 642 تەڭگەگە ءۇش ەسىك جاساتپاق» دەگەن ماتەريال جارىق كورگەن ەدى. سول ماقالاعا قاتىستى اقتوبە وبلىستىق پوليتسيا دەپارتامەنتى باستىعىنىڭ ورىنباسارى ازامات ساتىبالدين پىكىر ءبىلدىردى، - دەپ حابارلايدى ادىرنا ۇلتتىق پورتالى.
«اقتوبە وبلىسىنىڭ پوليتسيا دەپارتامەنتى (پد) 2 ملن 544 مىڭ 642 تەڭگەگە ءۇش ەسىك جاساتپاق» دەگەن ماتەريال جاريالانعاننان سوڭ، ءتىلشىمىز پوليتسيا دەپارتامەنتىنە: «جالپى قۇنى 2 544 642 مىڭ تەڭگەگە باعالانعان ءۇش ەسىك قانداي قاجەتتىلىكتەن ورناتىلدى؟، وبلىستىق پوليتسيا دەپارتامەنتىنىڭ بۇرىنعى ەسىكتەرى قايدا؟، ەسكى ەسىكتەر نە سەبەپتى جارامسىز دەپ تانىلدى؟ دەگەن سۇراقتار جولداعان بولاتىن.
ءتىلشىمىز جولداعان ساۋالدارعا اقتوبە وبلىسى پد باستىعىنىڭ ورىنباسارى ازامات قۇرمانتايۇلى ساتىبالدين وتە قىسقا، ءارى جاڭىلتپاش سەكىلدى تۇسىنىكسىز ماتىنمەن جاۋاپ بەرىپتى.
قاراڭىز:
«اقتوبە وبلىسى پوليتسيا دەپارتامەنتىنىڭ كەيبىر قىزمەتتىك بولمەلەرىندە بۇرىن ەسىكتەر بولماۋىنا جانە ستاندارتتى ەسىكتەر ورناتۋ مۇمكىندىگى بولماعان سەبەبىندە ولاردى جاساتۋ قاجەتتىلىگى تۋىنداعان. سول سەبەپتەن اقتوبە وبلىسى پوليتسيا دەپارتامەنتى ەسىكتەردى جاساتۋ جانە قوندىرۋ تۋرالى كونكۋرستى اشىق قولجەتىمدىلىگى بار مەملەكەتتىك ساتىپ الۋ پورتالىندا ء(ارى قاراي - پورتال) جاريالادى».
ماتىننەن اڭعارعانىمىز 2 544 642 تەڭگەگە دەپارتامەنتتىڭ سىرتقى ەمەس، ىشكى قىزمەتتىك بولمەلەرىنە ەسىك ورناتىلعان. دەمەك، بۇعان دەيىن جازعانىمىزداي ءبىرىنشى ەسىكتىڭ قۇنى - 1 071 428, ەكىنشى ەسىك - 821 428, ءۇشىنشى ەسىك 651 785 تەڭگەگە باعالانعان.
رەسمي جاۋاپتا دەپارتامەنت ىشىندەگى قىزمەتتىك بولمەلەردىڭ ەسىگى بولماعانى انىق ايتىلىپ تۇر. بۇرىن ەسىگى جوق بولمەگە جالپى قۇنى 651 785 مىڭنان باستالىپ، 1 071 428 تەڭگەگە دەيىن جەتەتىن ەسىكتەر نە سەبەپتى قاجەت بولا قالدى؟ جاي عانا قىزمەتتىك بولمەلەرگە ميلليون تەڭگەلىك ەسىك ورناتۋ قانشالىقتى اقىلعا سيادى؟
«قارۋ-جاراق ساقتالاتىن بولمەگە ەسىك ورناتۋ قاجەتتىلىگى تۋىندادى» دەسە تۇسىنەر ەدىك. پوليتسيا قىزمەتكەرلەرى وتىراتىن ءۇش قانا قىزمەتتىك بولمەگە ەكى ميلليوننان اسا قارجىنى جۇمساۋ كۇدىك تۋدىرماي ما؟
رەسمي جاۋاپتا «ستاندارتتى ەسىكتەر ورناتۋ مۇمكىندىگى بولماعان» دەگەن سىرعىتپا تىركەس ءجۇر. وبلىستىق پوليتسيا دەپارتامەنتى «ستاندارتتى ەسىك ورناتۋ مۇمكىن ەمەس» دەپ، مەملەكەت اقشاسىن وڭدى-سولدى شاشا بەرە مە؟
قانات بىرلىكۇلى
ادىرنا ۇلتتىق پورتالى
