12 qyrküiek künı Adyrna ūlttyq portalynda «Aqtöbe oblysynyŋ Polisiia departamentı 2 mln 544 myŋ 642 teŋgege üş esık jasatpaq» degen material jaryq körgen edı. Sol maqalaǧa qatysty Aqtöbe oblystyq Polisiia departamentı bastyǧynyŋ orynbasary Azamat Satybaldin pıkır bıldırdı, - dep habarlaidy Adyrna ūlttyq portaly.
«Aqtöbe oblysynyŋ Polisiia departamentı (PD) 2 mln 544 myŋ 642 teŋgege üş esık jasatpaq» degen material jariialanǧannan soŋ, tılşımız Polisiia departamentıne: «Jalpy qūny 2 544 642 myŋ teŋgege baǧalanǧan üş esık qandai qajettılıkten ornatyldy?, Oblystyq Polisiia departamentınıŋ būrynǧy esıkterı qaida?, Eskı esıkter ne sebeptı jaramsyz dep tanyldy? degen sūraqtar joldaǧan bolatyn.
Tılşımız joldaǧan saualdarǧa Aqtöbe oblysy PD bastyǧynyŋ orynbasary Azamat Qūrmantaiūly Satybaldin öte qysqa, ärı jaŋyltpaş sekıldı tüsınıksız mätınmen jauap berıptı.
Qaraŋyz:
«Aqtöbe oblysy polisiia Departamentınıŋ keibır qyzmettık bölmelerınde būryn esıkter bolmauyna jäne standartty esıkter ornatu mümkındıgı bolmaǧan sebebınde olardy jasatu qajettılıgı tuyndaǧan. Sol sebepten Aqtöbe oblysy polisiia Departamentı esıkterdı jasatu jäne qondyru turaly konkursty aşyq qoljetımdılıgı bar Memlekettık satyp alu portalynda (ärı qarai - portal) jariialady».Mätınnen aŋǧarǧanymyz 2 544 642 teŋgege departamenttıŋ syrtqy emes, ışkı qyzmettık bölmelerıne esık ornatylǧan. Demek, būǧan deiın jazǧanymyzdai bırınşı esıktıŋ qūny - 1 071 428, ekınşı esık - 821 428, üşınşı esık 651 785 teŋgege baǧalanǧan. Resmi jauapta departament ışındegı qyzmettık bölmelerdıŋ esıgı bolmaǧany anyq aitylyp tūr. Būryn esıgı joq bölmege jalpy qūny 651 785 myŋnan bastalyp, 1 071 428 teŋgege deiın jetetın esıkter ne sebeptı qajet bola qaldy? Jai ǧana qyzmettık bölmelerge million teŋgelık esık ornatu qanşalyqty aqylǧa siiady? «Qaru-jaraq saqtalatyn bölmege esık ornatu qajettılıgı tuyndady» dese tüsıner edık. Polisiia qyzmetkerlerı otyratyn üş qana qyzmettık bölmege ekı millionnan asa qarjyny jūmsau küdık tudyrmai ma? Resmi jauapta «standartty esıkter ornatu mümkındıgı bolmaǧan» degen syrǧytpa tırkes jür. Oblystyq polisiia departamentı «standartty esık ornatu mümkın emes» dep, memleket aqşasyn oŋdy-soldy şaşa bere me?
Qanat Bırlıkūly
Adyrna ūlttyq portaly
Ūqsas jaŋalyqtar
