اتىراۋدا بۇرىنعى شەنەۋنىكتەر الاياقتىق جاسادى جانە ءوز وكىلەتتىگىن اسىرا پايدالاندى دەگەن كۇدىكپەن قاماۋعا الىندى. بۇل تۋراسىندا 2023 جىل، 26 قىركۇيەك كۇنى وبلىستىق پروكۋراتۋرانىڭ ءباسپاسوز قىزمەتى مالىمدەدى، دەپ حابارلايدى "ادىرنا" ۇلتتىق پورتالى.
پروكۋراتۋراداعى ءباسپاسوز قىزمەتىنىڭ ناقتىلاۋىنشا, اتىراۋدا جەر قاتىناستارى، ساۋلەت جانە اتىراۋ قالاسى اكىمى اپپاراتىنىڭ بولىمدەرىنىڭ بۇرىنعى باسشىلارى قامالىپ وتىر.
"لاۋازىمدى تۇلعالار جەر ۋچاسكەلەرىن ءبولۋ جانە ولاردىڭ نىسانالى ماقساتىن انىقتاۋ كەزىندەگى الاياقتىق ارەكەتتەرى ءۇشىن كۇدىكتەنۋدە. پروكۋراتۋرا بۇل فاكتىنى قك 190-بابىنىڭ 4-بولىگىنىڭ 2-تارماعى (اسا ءىرى مولشەردە جاسالعان الاياقتىق) جانە قك 361-بابى (لاۋازىمدىق وكىلەتتىكتەردى تەرىس پايدالانۋ) بويىنشا تىركەدى", - دەپ مالىمدەدى اتىراۋ وبلىسىنىڭ پروكۋراتۋراسى.
قازىر وبلىس پروكۋراتۋراسى سوتقا دەيىنگى تەرگەپ-تەكسەرۋ جۇرگىزىپ جاتىر.
"ادىرنا" ۇلتتىق پورتالى
