استرونومدار «دجەيمس ۋەبب» تەلەسكوپىنىڭ كومەگىمەن يۋپيتەردىڭ سەرىگى ەۋروپانىڭ قويناۋىنان كومىرتەگى كوزىن تاپتى. بۇل تۋرالى اقش ۇلتتىق اەروناۆتيكا جانە عارىش باسقارماسى (NASA) ايتتى، دەپ حابارلايدى «ادىرنا» ءتىلشىسى.
زەرتتەۋشىلەر كومىرتەگى مەتەوريتتەر نەمەسە باسقا سىرتقى كوزدەر ارقىلى ەمەس، جەر استى مۇحيتىندا پايدا بولۋى مۇمكىن دەگەن قورىتىندىعا كەلدى.
«جەر بەتىندەگى تىرشىلىك حيميالىق ارتۇرلىلىكتى جاقسى كورەدى. ول نەعۇرلىم كوپ بولسا، سوعۇرلىم جاقسى. ءبىزدىڭ ءومىرىمىز كومىرتەگىگە نەگىزدەلگەن. ەۋروپا مۇحيتىنىڭ حيمياسىن ءتۇسىنۋ ارقىلى ونىڭ ءومىر ءسۇرۋ ءۇشىن قولايلى ورىن بولۋى مۇمكىن ەكەنىن انىقتاي الامىز»،—دەدى NASA-نىڭ گرينبەلت، مەريلەند شتاتىنداعى گوددارد عارىشتىق ۇشۋ ورتالىعىنىڭ جەتەكشى مامانى گەرونيمو ۆيللانۋەۆا.
الايدا عالىمدار كومىرسۋتەكتى ءتىرى نارسەلەر شىعارىپ جاتىر ما، جوق پا دەگەن سۇراققا ناقتى جاۋاپ بەرە الماي وتىر. بۇل ەۋروپاعا ارنايى ميسسيا جىبەرىلگەن كەزدە انىقتالۋى مۇمكىن.
ايتا كەتەيىك، NASA 2024 جىلدىڭ قازان ايىندا ەۋروپانى بىرنەشە رەت اينالىپ وتەتىن جانە وسى سپۋتنيكتە ءومىر ءسۇرۋ مۇمكىن بە دەگەن سۇراققا جاۋاپ ىزدەپ، دەرەكتەر جينايتىن عارىش كەمەسىن ۇشىرعالى وتىر.
