باس پروكۋراتۋرا ۇقك توراعاسىنىڭ بۇرىنعى ءبىرىنشى ورىنباسارى سامات ابىشكە قارسى تەرگەۋدى باستادى، دەپ حابارلايدى "ادىرنا" ۇلتتىق پورتالى.
"باس پروكۋراتۋرانىڭ ارنايى پروكۋرورلارى ۇلتتىق قاۋىپسىزدىك كوميتەتى توراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى "قاڭتار وقيعالارى" كەزىندە بيلىك پەن لاۋازىمدىق وكىلەتتىكتەردى اسىرا پايدالانۋ فاكتىسى بويىنشا سوتقا دەيىنگى تەرگەۋ جۇرگىزۋدە", - دەلىنگەن باس پروكۋراتۋرانىڭ حابارلاماسىندا.تەرگەۋ قۇپيا قۇجاتتامانىڭ ەداۋىر كولەمىن زەرتتەۋمەن بايلانىستى دەپ حابارلايدى. قىجك-ءنىڭ 201-بابىنا سايكەس تەرگەۋ مۇددەسىندە سوتقا دەيىنگى تەرگەپ-تەكسەرۋدىڭ وزگە دە دەرەكتەرى جاريا ەتۋگە جاتپايدى.
"سونىمەن قاتار، قاداعالاۋ ۆەدومستۆوسى كونستيتۋتسيا نورمالارىنا سايكەس زاڭ مەن سوت الدىندا بارلىعى تەڭ ەكەنىن اتاپ ءوتتى. تەرگەۋ قورىتىندىسى بويىنشا زاڭدى پروتسەسسۋالدىق شەشىم قابىلدانادى", - دەپ حابارلادى بپ.ەسكە سالا كەتەيىك، كەشە الماتىدا ءوتىپ جاتقان قاڭتار وقيعاسىنا قاتىستى سوتتا ۇلتتىق قاۋىپسىزدىك كوميتەتىنىڭ بۇرىنعى قىزمەتكەرى رۋسلان ىسقاقوۆ شۋلى مالىمدەمە جاساعان ەدى. ءىس بويىنشا نەگىزگى ايىپتالۋشىلار ىسقاقوۆتان بولەك، كريمينالدىڭ جەتەكشىسى، جابايى ارمان لاقاپ اتىمەن تانىلعان ارمان جۇماگەلديەۆ پەن قالالىق ءماسليحات دەپۋتاتى قايرات قۇدايبەرگەن بولعان. سوتتالۋشىنىڭ ايتۋىنشا, قاڭتار وقيعاسى كەزىندە ول ۇلتتىق قاۋىپسىزدىك كوميتەتى باسشىسىنىڭ ءبىرىنشى ورىنباسارى قىزمەتىن اتقارعان سامات ءابىشتىڭ بۇيرىعىن ورىنداعان. رۋسلان ىسقاقوۆ ۇقك 5-ءشى دەپارتامەنتىنىڭ باستىعى بولعان. اقپارات كوزدەرىندە سامات ءابىشتىڭ قازاقستاندا، "مىرزاقاماقتا" وتىرعاندىعى ايتىلادى. ەستەرىڭىزدە بولسا، ءبىر اي بۇرىن ۇلتتىق قاۋىپسىزدىك كوميتەتى (ۇقك) توراعاسىنىڭ بۇرىنعى ءبىرىنشى ورىنباسارى سامات ءابىش قازاقستاندا ەكەندىگى ءمالىم بولعان. 2022 جىلدىڭ 17 قاڭتارىندا سامات ءابىش ۇلتتىق قاۋىپسىزدىك كوميتەتى باسشىسىنىڭ ءبىرىنشى ورىنباسارى قىزمەتىنەن بوساتىلدى.
"ادىرنا" ۇلتتىق پورتالى
ۇقساس جاڭالىقتار
