ريددەردەگى جەو-نى جوندەۋگە ۇكىمەت رەزەرۆىنەن 7,3 ملرد تەڭگە بولىنگەن، دەپ حابارلايدى "ادىرنا" ءتىلشىسى.
شىعىس قازاقستانعا جۇمىس ساپارىمەن بارعان قر پرەمەر-ءمينيسترىنىڭ ءبىرىنشى ورىنباسارى رومان سكليار وبلىس اكىمى ەرمەك كوشەرباەۆپەن بىرگە وسكەمەن جانە ريددەر جەو-لارىندا بارىپ، جىلىتۋ ماۋسىمىنا دايىندىق بارىسىمەن تانىستى. ءوڭىردىڭ جىلۋ نىساندارىندا جوندەۋ جۇمىستارى اياقتالعان. قازىر جەو ىسكە قوسۋعا دايىندىق جۇرگىزىلىپ جاتىر.
كوكتەمدە اپات بولعان ستانسانى جوندەۋگە ۇكىمەت رەزەرۆىنەن 7,3 ملرد تەڭگە قاراستىرىلعان. بيىل مونوقالانىڭ جىلۋ جەلىلەرىن كۇردەلى جوندەۋدەن وتكىزۋگە 1,1 ملرد تەڭگە باعىتتالسا، وندىرىسكە تارتىلعان ينفراقۇرىلىمدى جوندەۋ پروتسەسىنە جەرگىلىكتى بيۋدجەتتەن 500 ملن تەڭگەدەن استام قاراجات ءبولىندى.
ءىس-ساپار بارىسىندا ريددەر جەو-دا ىسكە قوسۋ-رەتتەۋ جۇمىستارى بەلگىلەنگەن كەستەگە ساي جۇرگىزىلىپ جاتقانى تۋرالى ايتىلدى. رومان سكليار باستاعان دەلەگاتسيا ريددەردەن بولەك، وسكەمەن جەو-عا دا باردى. مۇندا جوندەۋ جۇمىستارى الدىڭعى جىلىتۋ ماۋسىمى اياقتالعاننان كەيىن بىردەن باستالعان بولاتىن. بۇگىندە ستانسانىڭ دايىندىعى 80%-دان اسادى، ال جوندەۋ جۇمىستارىنىڭ باعدارلاماسى قازان ايىنا دەيىن اياقتالادى دەپ جوسپارلانۋدا.
