قۇرمەتتى الماتىلىقتار!
بارشاڭىزدى مۇسىلمان قاۋىمى اسىعا كۇتكەن قاسيەتتى رامازان ايىنىڭ كەلۋىمەن قۇتتىقتايمىن.
سونداي-اق، بارشا قازاق جۇرتشىلىعىن وتان قورعاۋشىلار مەرەكەسىمەن جانە قاسيەتتى دە ۇلى مەرەكە – جەڭىس كۇنىمەن شىن جۇرەكتەن قۇتتىقتايمىن! بۇل مەرەكە – جانقيار ەرلىكتىڭ، ەڭسەلى ەلدىكتىڭ رۋحى ورلەپ، جەڭىس جالاۋى جەلبىرەگەن كۇن.
وسىنداي قاستەرلى دە قاسيەتتى مەرەكە كۇنى ەلدىڭ اراسىنا ىرىتكى سالىپ، تىنىشتىعىمىزدى بۇزۋ ارەكەتى ۇلكەن كۇنا دەپ ويلامىن. سەبەبى، اللا تاعالا قۇراندا «بۇلىك شىعارۋ ادام ولتىرۋدەن دە اۋىر كۇنا» - دەپ ەسكەرتەدى. دەمەك، ەل مەن قوعام ىشىندە بۇلىك سالۋشىلار اللا قۇزىرىندا كۇناحار بولادى.
بۇعان قوسا، مۇسىلمان جاماعاتى اسىعا كۇتەتىن قاسيەتتى رامازان ايى قۇلشىلىقتىڭ، قايىرىمدىلىق پەن تىنىشتىقتىڭ ايى. مۇسىلمان جاماعاتى كۇنىمەن ورازا ۇستاپ، كەشىن نامازبەن وتكىزەدى. وسىنداي قاسيەتتى ايدا بۇلىك شىعارۋ مۇسىلمانشىلىقتىڭ دا، ەشبىر ادامي قۇندىلىقتاردىڭ شەڭبەرىنە سىيمايدى.
9 مامىر – جەڭىس كۇنى ءارى مايداندا قازا تاپقان بابالارىمىزدى ەسكە الۋ كۇنى. بۇل كۇندە ەل مەن جەردى قورعاۋ جولىندا شەيىت بولعان اتالارىمىزعا دۇعا ەتىپ، قۇران وقىپ باعىشتاپ، ەڭ ۇلى قۇندىلىعىمىز - تاۋەلسىزدىگىمىزدى باعالاي ءبىلۋىمىز كەرەك. ەلدىڭ تىنىشتىعىن بۇزعىسى كەلەتىن كەيبىر توپتارعا تۇرعىندارىمىزدىڭ ەرمەۋى قاجەت دەپ سانايمىن. اللا تاعالا قۇراندا «راببىلارىڭ سەرت ەتتى، ەگەر سەندەر شۇكىرلىك ەتسەڭدەر ارتتىرامىن، كۇپىرلىك ەتسەڭدەر ازابىم كۇشتى» - دەيدى. سوندىقتان، ءبىز ەگەر قولداعى بار التىنىمىز – ەلبىڭ ىنتىماعى، تاۋەلسىزدىگى مەن تىنىشتىعىنىڭ قادىرىن ءبىلىپ باعالاساق، ۇزاعىنان بولادى. كەرىسىنشە جاعدايدا، وكىنىشكە تاپ بولۋىمىز مۇمكىن. وكىنىشتەن اللا ساقتاسىن بارشامىزدى!
وسى ورايدا، مەملەكەتتىك ورگاندار قوعامنىڭ تىنىشتىعىن قامتاماسىز ەتۋگە بارشا كۇش جۇمساپ، ەل اراسىندا قاندايدا ءبىر بۇلىك شىعارىپ، تىنىشتىعىمىزدى بۇزۋدى كوزدەگەن توپتارعا دەر كەزىندە ءتيىستى شارا قابىلداۋى كەرەك دەپ ويلايمىن. ءتۇرلى تەرىس ساياسي ارەكەتتەرگە جول بەرىلمەۋى قاجەت. سەبەبى، قوعامنىڭ قاۋىپسىزدىگى مەن ەلدىڭ تىنىشتىعىن ەشنارسەگە اۋىستىرۋعا بولمايدى.
سان عاسىرلار بويعى بابالارىمىزدىڭ اڭساعان تاۋەلسىزدىگىنە ءسىز بەن ءبىزدىڭ داۋىرىمىزدە قول جەتكىزدىك. تاۋەلسىزدىكتىڭ ارقاسىندا اللا تاعالا بىزگە ءتىلىمىزدى، ءدىنىمىزدى، ۇلتتىق قۇندىلىقتارىمىز بەن سالت-سانامىزدى قايتارىپ بەردى. بۇل ءۇشىن اللاعا مىڭ شۇكىر، ءجۇز تاۋبە دەپ ءاربىر قازاق ماقتانۋى قاجەت.
وسىناۋ الەمدىك جاھاندانۋ كەزەڭىندە 130 استام ۇلتپەن ۇلىس وكىلدەرى ءبىر تۋدىڭ استىندا تاتۋ-ءتاتتى ءومىر ءسۇرىپ جاتقانى ءبىزدىڭ مەملەكەتىمىزدىڭ سانالى ءارى ساليقالى ساياساتىنىڭ ارقاسى.
سوندىقتان قۇرمەتتى جاماعات، قۇرمەتتى قالا تۇرعىندارى مەن قوناقتارى، قۇرمەتتى قازاقستاندىقتار بارشاڭىزدى سابىرلىق پەن تاتۋلىققا شاقىرامىن. تەرىس پيعىلدى تاراپتاردىڭ ارەكەتىنەن ساق بولايىق.
ەندى عانا ەل بولىپ، ەڭسەمىزدى كوتەرىپ، كوك تۋىمىزدى جەلبىرەتىپ، الەمگە تانىلىپ كەلەمىز. سوندىقتان، اللا تاعالا بارشامىزعا بۇلىككە ەمەس بىرلىككە شاقىرۋدى ءناسىپ ەتسىن اعايىن!
الماتى قالاسى ورتالىق مەشىتىنىڭ باس يمامى
ەركىنبەك شوقاي
