قازاقستان پرەزيدەنتى قاسىم-جومارت كورەيا رەسپۋبليكاسىنىڭ پرەزيدەنتى يۋن سوك يولدى قابىلدادى، دەپ حابارلايدى “ادىرنا” ۇلتتىق پورتالى اقوردانىڭ ءباسپاسوز قىزمەتىنە سىلتەپ.
«اقوردادا قازاقستانعا مەملەكەتتىك ساپارمەن كەلگەن كورەيا رەسپۋبليكاسىنىڭ پرەزيدەنتى يۋن سوك يولدى سالتاناتتى تۇردە قارسى الۋ ءراسىمى ءوتتى»، - دەلىنگەن سارسەنبى كۇنى تاراتقان حابارلامادا.
قاسىم-جومارت توقاەۆ پەن يۋن سوك يول رەسمي دەلەگاتسيا مۇشەلەرىن ءبىر-بىرىمەن تانىستىردى. قۇرمەت قاراۋىل روتاسىنىڭ باسشىسى پرەزيدەنتتەرگە قۇتتىقتاۋ بايانداماسىن بەرىپ، ەكى ەلدىڭ ءانۇرانى شىرقالدى.
سالتاناتتى ءراسىم اياقتالعاننان كەيىن مەملەكەت باسشىلارى كەلىسسوزدەر زالىنا كىردى.
ەكى ەل دەلەگاتسيالارىنىڭ قاتىسۋىمەن وتكەن كەلىسسوز بارىسىندا مەملەكەت باسشىسى قاسىم-جومارت توقاەۆ پرەزيدەنت يۋن سوك ءيولدىڭ قازاقستانعا جاساعان العاشقى مەملەكەتتىك ساپارىن تاريحي وقيعا دەپ باعالادى. سونداي-اق بۇگىنگى كەلىسسوزدەر قازاق-كورەي ىقپالداستىعىنىڭ اياسىن كەڭەيتىپ، ەكىجاقتى بايلانىستى جاڭا بەلەسكە كوتەرەتىنىن ايتتى.
قازاقستان پرەزيدەنتىنىڭ پىكىرىنشە، وڭتۇستىك كورەيا جاھاندىق اۋقىمداعى ناعىز ەكونوميكالىق جانە تەحنولوگيالىق لوكوموتيۆكە اينالدى. ال الەمگە ايگىلى كورەي كورپوراتسيالارى حالىقارالىق ارەنادا ەلدىڭ «نەگىزگى جاھاندىق مەملەكەت» رەتىندەگى پوزيتسياسىن ىلگەرىلەتۋگە ەلەۋلى ۇلەس قوسىپ كەلەدى.
بۇدان بولەك، تاراپتار مادەني-گۋمانيتارلىق بايلانىستاردى دامىتۋ ماسەلەسىنە نازار اۋداردى.
“قازاقستاندا تۇراتىن 120 مىڭ ەتنيكالىق كورەي ۇلتىنىڭ وكىلدەرى ەكى ەل اراسىنداعى قاتىناستاردى نىعايتۋدا ماڭىزدى ءرول اتقارادى جانە وعان ولشەۋسىز ۇلەس قوسادى. ءوز كەزەگىندە كورەيادا ءبىلىم الىپ جاتقان مىڭنان استام قازاقستاندىق جاستار مەملەكەتتەر اراسىنداعى «دوستىقتىڭ التىن كوپىرى» سانالادى”، – دەدى قاسىم-جومارت توقاەۆ.
