مەملەكەت باسشىسى الماتىداعى مەرەكەلىك شارالارعا قاتىسسا، ەلباسى 1 مامىر مەيرامىن نۇر-سۇلتاندا اتاپ ءوتتى
قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆ قازاقستاندىقتاردى 1 مامىر – قازاقستان حالقىنىڭ بىرلىگى كۇنىمەن قۇتتىقتادى.
نۇرسۇلتان نازارباەۆ مەيرامدى ەلوردادا اتاپ ءوتتى. ول قازاق ەلى مونۋمەنتىنە گۇل قويىپ، حالىق الدىندا قۇتتىقتاۋ ءسوز سويلەدى.
ء"بىز – باقىتتى حالىقپىز. بىرلىگىمىزدى ساقتاپ، تاۋەلسىزدىگىمىزدى قۇرمەتتەۋىمىز كەرەك. دامۋ باعدارلامالارىمىزدى جۇزەگە اسىرۋ ەلىمىزدىڭ بولاشاعىن ودان ءارى جارقىن ەتە تۇسەدى. ءار ۇيگە، ءار وتباسىنا بەرەكە، باقىت، اماندىق جانە ەرتەڭگى كۇنگە دەگەن سەنىمدىلىك تىلەيمىن. مەيرامدارىڭىزبەن!"– دەدى ەلباسى.
مەملەكەت باسشىسى توقاەۆ الماتىعا جۇمىس ساپارىمەن بارىپ، مەيرامدى تۋعان قالاسىندا اتاپ وتۋدە.
"قىمباتتى الماتىلىقتار، الماتى – تاريحتاعى ورنى ەرەكشە قالا. ءدال وسى جەردە 1986 جىلدىڭ جەلتوقسان ايىندا بۇرىنعى كەڭەس وداعى رەسپۋبليكالارىنىڭ ءارى قاراي دامۋىنا اسەر ەتكەن وقيعا بولدى. وسى قالادا تاۋەلسىزدىگىمىزدىڭ دەكلاراتسياسى قابىلداندى. كوپتەگەن قازاقستاندىق پەن بۇكىل ەلدىڭ تاعدىرى الماتىمەن تىعىز بايلانىستى. كوكتەمنىڭ شۋاقتى كۇنىندە ءوزىم تۋىپ-ءوسىپ، ءبىلىم العان، قازاقستاننىڭ تاۋەلسىزدىگى ءۇشىن قىزمەت ەتە باستاعان تاماشا قالادا بولۋ مەن ءۇشىن ۇلكەن قۇرمەت ءارى عانيبەت", - دەپ توقاەۆ وڭتۇستىك استانا تۇرعىندارىن قۇتتىقتادى.
توقاەۆ ەلباسى 29 ساۋىردە قازاقستان حالقى اسسامبلەياسىنىڭ سەسسياسىندا ايتقان سوزدەردى قايتالاپ، قازاقستاندىقتار اۋىزبىرشىلىكتە ەڭبەك ەتىپ، مىقتى ءارى دامىعان مەملەكەت قۇرا الاتىنىن اتاپ ءوتتى.
"بىرلىك كۇنىمەن قۇتتىقتايمىن. ارقايسىڭىزعا باق-بەرەكە، جاڭا جەتىستىكتەر تىلەيمىن. قالامىز كوركەيە بەرسىن!", - دەپ ءسوزىن اياقتادى پرەزيدەنت.
Sputnik
