Memleket basshysy Almatydaǵy merekelik sharalarǵa qatyssa, Elbasy 1 mamyr meıramyn Nur-Sultanda atap ótti
Qazaqstannyń tuńǵysh prezıdenti – Elbasy Nursultan Nazarbaev pen memleket basshysy Qasym-Jomart Toqaev qazaqstandyqtardy 1 mamyr – Qazaqstan halqynyń birligi kúnimen quttyqtady.
Nursultan Nazarbaev meıramdy elordada atap ótti. Ol Qazaq eli monýmentine gúl qoıyp, halyq aldynda quttyqtaý sóz sóıledi.
"Biz – baqytty halyqpyz. Birligimizdi saqtap, táýelsizdigimizdi qurmetteýimiz kerek. Damý baǵdarlamalarymyzdy júzege asyrý elimizdiń bolashaǵyn odan ári jarqyn ete túsedi. Ár úıge, ár otbasyna bereke, baqyt, amandyq jáne erteńgi kúnge degen senimdilik tileımin. Meıramdaryńyzben!"– dedi Elbasy.
Memleket basshysy Toqaev Almatyǵa jumys saparymen baryp, meıramdy týǵan qalasynda atap ótýde.
"Qymbatty almatylyqtar, Almaty – tarıhtaǵy orny erekshe qala. Dál osy jerde 1986 jyldyń jeltoqsan aıynda burynǵy Keńes Odaǵy respýblıkalarynyń ári qaraı damýyna áser etken oqıǵa boldy. Osy qalada táýelsizdigimizdiń deklaraııasy qabyldandy. Kóptegen qazaqstandyq pen búkil eldiń taǵdyry Almatymen tyǵyz baılanysty. Kóktemniń shýaqty kúninde ózim týyp-ósip, bilim alǵan, Qazaqstannyń táýelsizdigi úshin qyzmet ete bastaǵan tamasha qalada bolý men úshin úlken qurmet ári ǵanıbet", - dep Toqaev ońtústik astana turǵyndaryn quttyqtady.
Toqaev Elbasy 29 sáýirde Qazaqstan halqy Assambleıasynyń sessııasynda aıtqan sózderdi qaıtalap, qazaqstandyqtar aýyzbirshilikte eńbek etip, myqty ári damyǵan memleket qura alatynyn atap ótti.
"Birlik kúnimen quttyqtaımyn. Árqaısyńyzǵa baq-bereke, jańa jetistikter tileımin. Qalamyz kórkeıe bersin!", - dep sózin aıaqtady prezıdent.
Sputnik
