الماتىدا باسپانا 12 پايىزعا دەيىن ارزاندايدى

1707
Adyrna.kz Telegram

الماتىدا باسپانا 10-12 پايىزعا دەيىن ارزانداۋى مۇمكىن. بۇل تۋرالى Almaty.tv تىلشىسىنە قازاقستان ريەلتورلار قاۋىمداستىعىنىڭ مۇشەسى ورىنباسار ساتاەۆ ايتتى. ماسەلەن، بيىل ءساۋىر ايىندا الماتىدا باسپانا 3 پايىزعا ارزانداعان. بىراق بۇل كورسەتكىش الداعى ۋاقىتتا تاعى 10-12 پايىزعا ءتۇسۋى مۇمكىن ەكەن. ءتىپتى، وڭتۇستىك استاناداعى اۋا رايىنا بايلانىستى مۇلىكتىڭ قۇنى قۇبىلاتىنى تاعى بار دەيدى.

"بىلتىر قىستا ءبارىمىز دە وسى بولجامنىڭ ورىندالۋىن كۇتتىك. نەگە دەسەڭىز، بىلتىر كوكتەمدە تۇرعىن ۇيگە قاتىستى مەملەكەتتىك باعدارلامالار ىسكە قوسىلدى. "7-20-25", "باسپانا حيت" سەكىلدى باعدارلامالار جۇزەگە اسا باستادى. الماتى قالاسىنا 25 ميلليونعا دەيىن، استانا قالاسىنا 20 ميلليونعا دەيىن شەكتەۋلەرى بولدى. قۇرىلىس كومپانيالارى بۇل باعدارلامالارعا دايىندىقپەن كىرىستى. بۇرىنعىداي قۇرىلىس ماتەريالدارىن شەتەلدەن شارىقتاعان باعادا اكەلمەيدى، شەكتەۋلى باعامەن وزىمىزدە ساتىپ الادى. سودان دا بولار، ءۇي قۇنى تۇراقتالدى", - دەيدى ورىنباسار ساتاەۆ.

ونىڭ ايتۋىنشا، مەملەكەتتىك باعدارلامالار ءۇي باعاسىنىڭ شارىقتاپ كەتپەۋىنە اسەرىن تيگىزىپ وتىر. "دەگەنمەن استانا مەن الماتى ءىرى قالالار، مۇندا تۋريستەر كوپ كەلەدى، سوندىقتان باعانى ۇستاپ تۇرامىن دەپ ايتۋ قيىن. ويتكەنى سۇرانىس جوعارى. ونىڭ ۇستىنە، ۆاليۋتا باعامىنىڭ سەكىرۋى، قۇرىلىس ماتەريالدارىنىڭ قىمباتتاۋى دا باسپانا قۇنىنا تىكەلەي اسەر ەتەدى. ال، ايماقتاردا ءۇي الۋ الدەقايدا جەڭىلىرەك بولادى دەپ ويلايمىن", - دەيدى مامان. ساتاەۆتىڭ ايتۋىنشا، قازىر ساتىپ الۋشىلارعا تولەمنىڭ سان-الۋان ءتۇرى ۇسىنىلعان. بىراق، ولاردىڭ كوبى يپوتەكادان گورى ءبولىپ تولەۋدى كوبىرەك تاڭدايدى. ويتكەنى پايىزى جوق، ارتىق تولەم جاسامايدى.

پىكىرلەر