جازا مەرزىمىن قاماۋدا وتەپ جاتقان ازاماتتىق بەلسەندى تيمۋر دانەباەۆتى تۇرمە قىزمەتكەرلەرى ۇرىپ جاتقان ۆيدەو الەۋمەتتىك جەلىدە تارادى، دەپ حابارلايدى "ادىرنا".
ۆيدەودا شاشى الىنعان، سوتتالعاندارعا ارنالعان كيىم كيگەن ادام مەن بىرنەشە تۇرمە قىزمەتكەرىنىڭ قاراڭعى بولمەدە تۇرعانى انىق بايقالادى.
ورتادا تۇرعان ازاماتتىڭ كەۋدەسىندەگى وڭ جاقتاعى جازۋدا "تيمۋر دانەباەۆ" دەگەن ەسىم بولعان. ۆيدەودا جازاسىن وتەۋشىگە ەكىنشى بىرەۋ وكتەم داۋىسپەن: "تۇرمە تارتىبىنە باعىنبادىڭىز، بىرنەشە رەت ەسكەرتۋ جاسالدى، ونى ورىنداماي قويدىڭىز" دەيدى دە، قاسىنداعى وزگە ادامدارعا بۇرىلىپ: "ارنايى قۇرالدى قولدانىڭدار!" دەپ بۇيىرادى.
بۇيرىقتان سوڭ تۇرمە قىزمەتكەرىنىڭ كيىمىن كيگەن التى ادام الگى جازاسىن وتەۋشىنى تاس ەدەنگە ەتپەتىنەن جاتقىزىپ، اياق-قولىن قايىرىپ، كۇشپەن ۇستاپ وتىرادى. ۆيدەودان ءبىر تۇرمە قىزمەتكەرى تۇتقىننىڭ جانىنا تىزەرلەپ وتىرىپ، ارنايى قۇرال – رەزەڭكە تاياقپەن قۇيىمشاقتان تومەن تۇستى كوزدەپ، بار كۇشىمەن قۇلاشتاپ تۇرىپ ءتورت رەت ۇرعانىن بايقاۋعا بولادى.
قاتتى تيگەن سوققىدان تاس ەدەندە جاتقان ادامنىڭ جانۇشىرا ايعايلاعانى ەستىلەدى. بىراق ۇرىپ جاتقان ادام ونى ەش ەلەمەيدى.
جازاسىن وتەۋشىنى ازاپتاۋعا قاتىستى بەينەدە وقيعا اقمولا وبلىسى اتباسار قالاسىنداعى جازا وتەۋ مەكەمەسىندە 24 تامىزدا بولعان دەپ جازىلعان.
قىزمەتكەر بەلسەندىگە «سانيتاريا-گيگيەنا نورمالارىن ساقتاۋ» تۋرالى مىندەتىن ايتىپ، كۇش قولدانۋعا بۇيرىق بەرگەن. ۆيدەو سوڭىندا بۇيرىق بەرۋشى قىزمەتكەر بەلسەندىگە اكىمشىلىك حاتتاما تولتىرىلاتىنىن ايتادى.
تارالعان ۆيدەودا تۇتقىندى ۇرۋعا قاتىسقان كەيبىر قىزمەتكەرلەردىڭ بەت-الپەتى دە انىق كورىنىپ قالعان. ودان بولەك ارنايى كيىمدەگى بىرەۋىنىڭ يىعىنداعى اعا لەيتەنانتتىڭ پوگونى دا كوزگە شالىنادى.
بيلىك "قىزمەت وكىلەتىن اسىرا پايدالانۋ" فاكتىسى بويىنشا تەكسەرۋ باستاعانىن مالىمدەدى.
بىراق "ساياسي تۇتقىن" اتانعان تيمۋر دانەباەۆتىڭ قازىرگى جاعدايى قالاي ەكەنىن ايتپادى.
ۇقساس جاڭالىقتار
