بۇگىن تۇسكە دەيىنگى ۇكىمەت وترىسىندا پرەمەر-ءمينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا استاناعا كوشىپ كەلۋشىلەرگە شەكتەۋ ەنگىزۋ دۇرىس دەپ پىكىر بىلدىرگەن. مينيستر تۇستەن كەيىن جۋرناليستەردى كەڭسەسىنە شاقىرىپ، قويىلعان سۇراقتى دۇرىس تۇسىنبەگەنىن جەتكىزدى. بۇل جايلى "ادىرنا" ۇلتتىق پورتالى حابارلايدى.
"استانادا تۇرۋعا بايلانىستى شەكتەۋگە توقتالايىن. استانادا تۇرۋعا، كەلىپ-كەتۋگە شەكتەۋ جوق. كونستيتۋتسياعا سايكەس بۇگىنگە دەيىن ەلورداعا كەلۋ مەن كەتۋگە ەشقانداي شەكتەۋ بولماعان. مۇنداعى شەكتەۋ تەك ادام تۇرۋعا ارنالماعان عيماراتتى جالعا بەرگەندەرگە قاتىستى بولادى. مىسالى، گاراجدى جالعا بەرەتىن ادامدارعا شەكتەۋ بولادى. ونى جالعا الىپ تۇرعاندار بار. ونداي جەردە ادامدى تىركەۋگە بولمايدى. وسى نىساندى جالعا بەرگەن ادامنىڭ جاۋاپكەرشىلىگىن كۇشەيتۋ، ياعني ايىپپۇل مولشەرىن 15 اەك-تەن 30 اەك-كە (51 750 تەڭگەدەن 103 500 تەڭگەگە، 1 اەك – 3450 تەڭگە) دەيىن كوتەرۋ تۋرالى ۇسىنىس جاسالدى. قازىرگى تاڭدا بۇل ماسەلەنى جۇمىس توبى قاراپ جاتىر", - دەدى تامارا دۇيسەنوۆا.توقسان اۋىز ءسوزدىڭ توبىقتاي ءتۇيىنى، مينيستر استانادا تۇرىپ، جۇمىس ىستەگىسى كەلەتىن ازاماتتاردىڭ تۇرعىلىقتى مەكەنجايى بولسا، وندا ەلوردادا تۇرا بەرۋگە بولاتىنىن ەسكەرتتى.
"ادىرنا" ۇلتتىق پورتالى
ۇقساس جاڭالىقتار
