الماتىدا "جاڭا قازاقستان فورۋمى" قوعامدىق ۇيىمى ارنايى ءباسپاسوز ءماسليحاتىن وتكىزىپ، پرەزيدەنت سايلاۋىنا "ۇلت تاعدىرى" قوزعالىسى اتىنان ءوز ۇمىتكەرى رەتىندە بەلگىلى ساياساتكەر ءامىرجان قوسانوۆتى ۇسىناتىنىن مالىمدەدى
"ۇلت تاعدىرى" قوعامدىق قوزعالىسى قازاقستان پرەزيدەنتتىگىنە ءامىرجان قوسانوۆتىڭ كانديداتۋراسىن ۇسىندى ، دەپ حابارلايدى Sputnik قازاقستان
وسىعان دەيىن ءامىرجان قوسانوۆ قازاقستانداعى وپپوزيتسيالىق پارتيالار باسىن قوسىپ، الداعى سايلاۋعا ءوز كانديداتۋراسىن ۇسىنسا، ونى قولداپ، قوسشى بولۋعا دايىن ەكەنىن ءمالىم ەتكەنىن ايتادى.
"الايدا، وكىنىشكە قاراي، ولار اۋىزبىرشىلىك تانىتا المادى. سوندىقتان الداعى سايلاۋعا ۇلشىلدار ءوز ۇمىتكەرىن ۇسىنۋ تۋرالى شەشىم قابىلداپ، مەنى تاڭدادى. بۇل ءۇمىتتى اقتاۋعا تىرىسامىن", - دەدى قوسانوۆ ءباسپاسوز ءماسليحاتىندا.
ءامىرجان قوسانوۆ 1964 جىلى قىزىلوردا وبلىسى ساپاق اۋىلىندا دۇنيەگە كەلگەن. بەلگىلى ساياساتكەر. نەگىزگى ماماندىعى جۋرناليست. 1994-1997 جىلدارى اكەجان قاجىگەلدين باسقارعان ۇكىمەتتىڭ ءباسپاسوز حاتشىسى بولدى. 1998 جىلى قاجىگەلدين باسقارعان قازاقستان حالىق پارتياسى توراعاسىنىڭ ورىنباسارى، 2005 جىلى جالپىۇلتتىق سوتسيال-دەموكراتيالىق پارتياسى توراعاسىنىڭ ورىنباسارى قىزمەتىن اتقاردى.
2009 جىلى جسدپ مەن ازات پارتيالارى قوسىلدى. ول وسى بىرىگۋگە ات سالىسىپ، پارتيا باسشىلىعىندا بولعان تۇلعانىڭ ءبىرى. دەگەنمەن 2013 جىلى پارتيا ىشىندە ىرىتكى بولىپ، ول لاۋازىمدى قىزمەتىنەن بوسادى.
ال بىلتىر مامىر ايىندا "جاڭا قازاقستان فورۋمى" قوعامدىق ۇيىمى قۇرىلدى. وعان "ۇلت تاعدىرى", "التىنبەك سارسەنبايۇلى قورى", "بولاشاق" جاستار قوزعالىسى ءتارىزدى بىرنەشە قوعامدىق ۇيىم ەندى. ءامىرجان قوسانوۆ تا بۇگىندەرى وسى فورۋمنىڭ مۇشەسى. وسىلايشا وپپوزيتسيالىق ۇيىمداردان كوڭىلى قالعان ساياساتكەر سوڭعى كەزدەرى ۇلتشىلدار قاتارىنا كەلىپ قوسىلعان.
قازاقستان پرەزيدەنتتىگىنە ۇمىتكەرلەر
پرەزيدەنت سايلاۋىنا قازاقستانداعى ءتورت پارتيا ءوز كانديداتىن ۇسىندى. "Nur Otan" پارتياسىنان قاسىم-جومارت توقاەۆ، "اق جول" پارتياسىنان دانيا ەسپاەۆا، "اۋىل" پارتياسىنان تولەۋتاي راقىمبەكوۆ، قازاقستان كوممۋنيستىك حالىق پارتياسىنان جامبىل احمەتبەكوۆ باعىن سىناپ كورمەك.
بۇدان بولەك، قر كاسىپوداقتار فەدەراتسياسى اتىنان ەكس-دەپۋتات، باتىس قازاقستان وبلىستىق اۋماقتىق كاسىپوداقتار بىرلەستىگىنىڭ توراعاسى امانگەلدى تاسپيحوۆ پرەزيدەنتتىككە تالاسادى، ال "ۇلى دالا قىراندارى" رەسپۋبليكالىق قوزعالىسى جازۋشى، جۋرناليست سادىبەك تۇگەلدىڭ كانديداتۋراسىن ءبىرىنشى بولىپ ۇسىنعان ەدى.
