بيىل اۋىلداعى وقۋشىلارعا قولداۋ كورسەتۋ ماقساتىندا «Dauletten» قايىرىمدىلىق قورى «اۋىلداعى اعايىننىڭ بالالارىنا» اتاۋىمەن ەرەكشە قايىرىمدىلىق جوباسىن جۇزەگە اسىرۋدا.
جاڭا وقۋ جىلىنا بالالاردىڭ مەكتەپكە دايىندىعى اتا-انالاردىڭ قالتاسىنا اۋىر كەلەتىنى ءسوزسىز. اسىرەسە الىستاعى اۋىلداردا تۇراتىن اتا-انالار ءۇشىن بۇل قيىننىڭ قيىنى. شالعاي اۋىلدا تۇرسا دا، وقۋشىلار ءبىلىم الۋى ءۇشىن قاجەتتى زاتتارمەن قامتاماسىز ەتىلۋى ءتيىس.
«اۋىلداعى اعايىننىڭ بالالارىنا» قايىرىمدىلىق جوباسىنىڭ ماقساتى – الىس اۋىلداردا تۇراتىن وقۋشىلاردى مەكتەپكە قاجەتتى وقۋ قۇرالدارىمەن قامتاماسىز ەتۋ. قايىرىمدىلىق كەرۋەنى قازاقستاننىڭ بارلىق وڭىرلەرىن ارالاۋدا. رەسپۋبليكا بويىنشا كەمى 1000 اۋىلدىق وقۋشى كومەك الادى. ءار وقۋشىعا سومكە جانە وقۋعا قاجەتتى وقۋ قۇرالدارى جيناقتالعان. كومەك الۋشى وقۋشىلار ءتىزىمى جەرگىلىكتى وبىلستىق ءبىلىم باسقارمالارىمەن جيناقتالدى.
«ءبىزدىڭ قايىرىمدىلىق كەرۋەنىمىز ماڭعىستاۋ وبلىسىنان باستاۋ الدى. بۇگىنگى كۇنگە دەيىن ماڭعىستاۋ، قوستاناي، تۇركىستان، سولتۇستىك قازاقستان وبلىستارىنا كومەكتەر تاراتىلدى. ايدىڭ اياعىنا دەيىن قالعان وڭىرلەردى ارالاپ، اۋىل وقۋشىلارىنىڭ قولىنا تابىستايتىن بولامىز. قايىرمىدىلىق جوباسى قايىرىمدى حالىقتىڭ كومەگىمەن جۇزەگە اسۋدا. قول ۇشىن سوزعان ءاربىر جانعا العىس ايتامىز. كومەك بەرەمىن دەيتىن جاندار بولسا «Dauletten» قورىنىڭ رەسمي شوتىنا قاراجات اۋدارا الادى.» - دەيدى قور پرەزيدەنتى جاسۇلان بوستاندىقۇلى.
ەسكە سالا كەتەيىك، قور مۇقتاج جاندارعا باسپانا الىپ بەرۋمەن جانە ءبىلىمدى جاستاردى قولداۋمەن اينالىسادى. قور بىلتىر وقۋشىلاردىڭ مەكتەپكە دايىندىعى ءۇشىن «زەيىندى 1000 بالا» اتاۋىمەن ەل بويىنشا 1000 بالاعا 30 000 000 تەڭگە كولەمىندە قارجىلاي قولداۋ كورسەتكەن. وقۋشىلاردى مەكتەپكە دايىنداۋدى قور جىل سايىن داستۇرگە اينالدىرۋدا.
"ادىرنا" ۇلتتىق پورتالى
